Sävehof hevur verið hart rakt av skaðum, har Elias Ellefsen á Skipagøtu og aðrir leikarar eru uttanfyri í longri ella styttri tíðarskeið.
Tí gekk heldur illa hjá Sävehof teir fyrstu dystirnar í bestu svensku hondbóltsdeildini, men seinastu dystirnar hevur tað bragdað hjá Sävehof.
Sävehof vann í dag stórsigur 32-22 á Aranäs á heimavølli í Partille. Í steðginum var Sävehof á odda 17-12.
Bert 17 ára gamli Óli Mittún fekk aftur nakað av spælitíð í dag. Í dag skoraði Óli eitt mál uppá tvær málroyndir.
Sävehof er nú nummar trý í deildini við átta stigum fyri seks dystir. Kristianstad er greitt oddalið við 14 stigum fyri sjey dystir.
Komandi dystur hjá Sävehof verður mánakvøldið 31. oktober. Tá spælir Sävehof á útivølli móti Malmö.
