Eiðis bygdaráð hevur samtykt fíggjarætlan fyri 2026, og her er eitt nú samtykt at seta pening av til at vetrarfriða Ljósá.
- Tilgongdin at vetrarfriða Eiðis kommunu byrjaði í 2015, tá avtala varð gjørd við hagapartarnar Norður og Suðurhelvt á Eiði.
Í Eiðis kommunu vísa tey á, at longu árið eftir bleiv hegnað, og rulluportur sett upp og harvið varð Eiðis bygd vetrarfriðað.
- Fýra ár eftir hetta - ella í 2020 - varð avgerð tikin um at vetrarfriða Svínáir. Tá varð sáttmáli gjørdur við hagapartin Svínáhaga sunnara part.
Og nú er so ein ætlan samtykt um at vetrarfriða Ljósá í 2026.
- Við ársbyrjan 2026 er ætlanin at fara í samráðingar við avvarðandi hagapartar.
Í Eiðis kommunu siga tey, at gongst sum ætlað verður Ljósá - og harvið allar bygdirnar í kommununi - vetrarfriðaðar í 2026.
- Komandi tíðina fara vit at vísa á ymiskar íløguætlanir og raðfestingar hjá Eiðis kommunu fyri 2026, siga tey í Eiðis kommunu.
