NSÍ boðar frá, at Oddur Árnason Højgaard hevur skrivað undir nýggjan sáttmála við NSÍ. NSÍ leggur dent á, at teir royndu spælararnir nú skulu taka um endan.
- Oddur er enn ein spælari í røðini av etableraðum NSÍ-spælaru, ið følir, at hann eisini skal vera við til at spæla NSÍ upp aftur í bestu deildina. Við yvir 200 dystum í bestu deildini er talan um ein ógvuliga royndan spælara, ið kemur at stýra verjuni hjá NSÍ, skrivar felagið.
Tað tekur miðverjin eisini undir við í stuttari viðmerking á heimasíðuni hjá NSÍ.
- Tað liggur ein ávís ábyrgd á okkum eldru spælarum at bera, tá á stendur. Her eru tó nógvir ungir, og spennandi spælarar í hópinum, og eg vil fegin verða partur av endurreisnini av NSÍ, sigur Oddur Árnason Højgaard.
NSÍ gjørdi fyri kortum sáttmála við Dion Splidt, sum eisini hevur væl fyri hundrað dystir í bestu deildini, so ikki kann sigast annað enn, at NSÍ ætlar sær upp aftur í bestu deildina sum skjótast.
