Í roynd og veru er hetta størsta politiska málið nakrantíð, sum Føroya Løgting skal taka støðu til. Hetta er eitt mál, sum hevur breiða semju í løgtinginum, men sum Fólkaflokkurin kortini stýrir, tí eingin politiskur flokkur stendur Fólkaflokkinum kurl í fiskivinnumálum. Tað er tí líkamikið, um Fólkaflokkurin samstarvar við Javnaðarflokkin, Tjóðveldisflokkin ella Sambandsflokkin. Hann hevur samstarvað við allar í hesari øldini, og støðan er tann sama, at í fiskivinnumálum ræður Fólkaflokkurin eina.
Alt framtíðarríkidømi okkara liggur tí í hondum løgmans og Sambandsfloksins. Løgmaður skal tí einsamallur gera av, hvørja leið, vit skulu fara, um vit skulu fara fólkafloksleiðina við at lata nøkrum ávísum reiðarum alt fiskiríkidømi, ella vit skulu gera sum Framsókn, Tjóðveldi, Javnaðarflokkurin vilja – og sum Sambandsflokkurin vil innast inni: Skipa hesi viðurskifti soleiðis, at Føroya fólk fær lut í síni egnu ogn – ogn Føroya fólks.
Tað er hesa stóru avgerð, sum Kaj Leo Holm Johannesen, løgmaður, stendur einsamallur við. Tað er upp til hann einsamallan at gera av, um vit vilja skapa eitt samfelag við nøkrum fáum fiskivinnubarónum, nøkrum fáum familjum, sum skul eiga alt tilfeingi í landinum og hava tilsvarndi vald, ella vit skulu hava eitt samhaldsfast samfelag, har allar borgarar hava somu rættindi og somu skyldur.
Íslendski profesarin, Thorvaldur Gylfason legði ikki fingrarnar ímillum, tá hann greiddi frá, hvussu íslendska tjóðarognin í havinum endaði á privatum hondum: Í 1984 góvu politikararnir nøkrum fáum reiðarum rættin til fiskiríkidømið. Hetta førdi til eitt fámannaveldi, sum Hægsti Rættur í 1998 staðfesti var grundlógarbrot. Men korrumperaða politiska skipanin fekk broytt hesa staðfesting, sum tó varð staðfest í mannarættindadómstólinum í Strasbourg í 2007, sum staðfesti, at útlutingin av fiskiríkidøminum var brot á altjóða mannarættindi, tí allir borgarar eru javnsettir mótvegis almennum ognum.
– Lata føroyingar nøkrum fáum fiskiríkidømið, fara teir eisini at tapa eitt slíkt mál í Strasbourg, undirstrikaði íslendski professarin.
Hetta er ein sera áhugaverdur boðskapur, sum løgmaður vónandi grundar væl og virðiliga yvir. Tað er rós vert, at andstøðan skipar fyri slíkari ráðstevnu – sum tvørpolitiskt er gevandi og áhugaverd. Hetta er ikki at leggja samgonguni fótonglar. Tann avgerðin, sum skal takast, skal tola allan kritikk, annars er hon ikki borðbar.
Kaj Leo Holm Johannesen, víst nú títt virði sum løgmaður Føroya fólks!
