Í blaðnum síðsta fríggjadag segði Johan Dahl, at »tað stendur ongastaðni í prospektinum, sum er grundarlagið undir einskiljingini, at størri partur av flogfelagnum skal einskiljast.«
Vit søgdu á hesum stað fríggjadagin, at tað sum landsstýrismaðurin førdi fram ikki passaði. Tí tað stendur positivt og beinleiðis í prospektinum, at landsstýrið ætlaði at privatisera ein triðing afturat.
Við hesum hevur landsstýrið givið eitt lyfti til íleggjarar um, at meirilutin av felagnum skal á privatar hendur. Sama lyftið gav táverandi landsstýrismaður tann dagin, felagið varð skrásett á børsinum – og tað varð mett so týdningarmikið, at tað varð fráboðað børsinum. Tað er hetta lyftið, sum Johan Dahl hevur brotið.
Sosialurin hevur roynt at fáa Johan Dahl til at greina hetta nærri, men tað hevur hann ikki viljað. Ístaðin sendi Vinnumálaráðið í gjár út eina almenna fráboðan um, at Sosialurin hevur »misskilt« prospektið.
Í eftirrationaliseringini hjá Vinnumálaráðnum verður sagt, at ætlanin um at privatisera seinna partin kann verða broytt.
– Sjálvandi kann hon tað! Talan er um eina løgtingslóg, og allar løgtingslógir kunnu broytast. Men tað broytir ikki tann veruleika, at tað sendur beinleiðis og positivt nevnt í prospektinum, sum er grundarlagið hjá íleggjarum, at næsti triðingurin skal á privatar hendur. Høvdu stóru privatu íleggjararnir ikki fingið hesa trygd í 2007, so høvdu teir ikki sett pengar í felagið.
Tað er órógvandi, at ein landsstýrismaður ber seg soleiðis at. Serliga órógvandi er tað, at Johan Dahl eisini hevur ábrygd av ætlanini »Invest in the Faroes«, sum gongur út upp á at fáa útlendskar íleggjarar til Føroya.
Vit kunnu akkurát tað sama siga tað beinanvegin: Eingin útlendskur íleggjari fer at seta eina krónu í nakað virksemi, sum Johan Dahl og hetta landsstýrið hava við at gera. Tað sigur seg sjálvt. Eingin letur seg lumpa fleiri ferðir – hetta er ein spurningur um álit – um eitt álit, sum ikki er til.
Ætlanin við Invest in the Faroes er tí deyðadømd, tí landsstýrið styggir íleggjarar frá sær.
