Soleiðis segði Rúni Heinesen, formaður í kringvarpsstýrinum, tá vit millum jól og nýggjárs spurdu hann, hvat kringvarpsstýrið helt um, at eitt privat felag var sloppið at gera nýggjárssendingina, sum ikki varð boðin út, so sum hon átti sambært rundskrivi úr Fíggjarmálaráðnum – og at eitt nú Tórshavnar Kommuna og Klaksvíkar Kommuna sluppu at keypa sær pláss í sendingini.
Men tað dugdi formaðurin í kringvarpsstýrinum ikki at síggja sum nakran trupulleika – tá.
Men nú er tað ein trupulleiki hjá honum, at Kringvarpið hevur brotið leiðreglur um góðan fjølmiðlasið, og at Tórshavnar kommuna og Klaksvíkar kommuna sluppu at keypa sær pláss til profilering í nýggjárssendingini.
Við in.fo mikudagin segði stýrisformaðurin soleiðis:
– Tað stutta av tí langa er, at hetta verður ikki gjørt aftur – og sipaði hann til leistin við einum almennum og privatum samstarvi, sum Sp/f Fjølvinna og Kringvarp Føroya gjørdu í felag.
Týsdagin hevði kringvarpsstýrið fund um málið, og mikudagin bóðu vit Rúna Heinesen greiða frá, hvør niðurstøðan var, nú stýrið viðgjørdi nýggjárssendingina.
Men tað vil Rúni Heinesen ikki siga. Hann tosar um eitt tíðindaskriv, sum tey sita og skriva, og sum tey skulu brúka tríggjar dagar um at viðgera, áðrenn tað kann sendast.
Men hann segði tó við in.fo mikudagin, at kommunur skulu heldur ikki sleppa at keypa seg inn í sendingar við stuðli. Hetta og annað í sendingini er ikki í tráð við reglurnar um góðan fjølmiðlasið«.
Tað løgna við stýrisformanninum er bara, at vit søgdu honum frammanundan, at Kringvarpið hevði selt pláss í nýggjarssendingini til hægstbjóðandi, og at Kringvarpið hevði framt brot á rundskrivið frá fíggjarmálaráðnum, sum áleggur stovninum at bjóða eina sending sum hesa út. Kortini gjørdi Rúni Heinesen einki, men læt skaðan henda.
Nú aftaná kemur hann sum ketta úr høvdatrog, og sigur tað sama.
Álvaratos Rúni Heinesen. Hvat gert tú í kringvarpsstýrinum? Er tíðin ikki komin, at tú leggur frá tær, tá einki kortini fær avleiðingar?
Kringvarpið er á eini niðurbræðingarkós. Um onkur ikki bjargar stovninum, so endar heilt galið. Kringvarpsstýrið lyftir ikki hond frá síðu, og úr Mentamálaráðnum frættist einki.
Eyðsýndi spurningurin er nú, hví skulu vit rinda 3.625 krónur í kringvarpsskatti? Og hvat gjalda vit fyri?
