Tað er ikki ein kanning, men tríggjar kanningar, sum eru gjørdar í Føroyum og millum føroyingar gjøgnum hetta árið. Seinasta veljarakanning, sum gav løgmanni og samgonguni meirluta, varð almannakunngjørd í Sosialinum 9. november í 2012.
Sambandsflokkurin hevur annars staðið seg væl í felstu kanningunum, meðan tað serliga eru Fólkaflokkurin og Sjálvstýrisflokkurin, sum hava staðið fyri tapunum. Í seinastu kanning misti Fólkaflokkurin 5,4 prosentstig, meðan hann hesaferð vinnur 3,5 prosentstig av hesum innaftur, Samstundis missir Sambandsflokkurin 1,2 prosentstig meira síðani seinsatu kanning. Í mun til valið í 2011 missir sambandsflokkurin 3,8 prosentstig.
Tað er rætt, sum løgmaður sigur – og sum allir løgmenn, sum missa, – plaga at siga, at tað kostar at sita við ábyrgd.
Men ein veljarakanning er løtumynd av, hvat veljarin heldur. Og løtumyndin í februar í ár, og løtumyndin í september í ár eins og løtumyndin nú í november er, at samgongan ikki hevur meiriluta fyri sínum politikki.
Og jú, sjálvandi kann tað broytast til eitt val. Men hetta eigur at siga politikarunum, at ymisk viðurskifti eru, sum veljararnir ikki eru heilt nøgdir við.
Tað sum vert er at merkja sær er, at Fólkaflokkurin er um at yvirhála Sambandsflokkin í samgonguni. Millum manna verður Fólkaflokkurin fataður sum tann ráðandi flokkurin í samgonguni. At Javnaðarflokkurin missir í mun til síðstu kanning er helst av orrustuni innanfloks – hóast tað ikki sær út til at ganga út yvir tingmannatalið, at Gerhard Lognberg varð koyrdur úr flokkinum.
Hóast alt hevur sína tíð – og okkurt bendir á, at tíðin hjá hesi samgonguni er við at halla, so er framveigs óvist, hvat alternativið er.
Spurningurin er so, um Tjóðveldi fyri fyrstu ferð skal fáa løgmann...
