Og andstøðan veit heldur ikki, hvat hon skal gera. Í fjør høvdu vit somu kreppu við Fólkaflokkinum, sum ikki vildi taka undir við fíggjarkarminum, sum landsstýrið legði fyri tingið. Ta ferðina fekk spenta støðan andstøðuna at leggja fram eitt misálitisuppskot á løgmann. Men andstøðan, sum eftir øllum at døma hevði vónað, at onkrir fólkafloksmenn fóru at taka undir við uppskotinum, kláraði ikki ein gong sjálv at manna lið, tá misálitisuppskotið kom til viðgerðar. Sjálvur tingformaðurin, Hergeir Nielsen og Karsten Hansen úr Miðflokkinum møttu ikki til arbeiðis hendan dagin, og tí fall tað við einum braki.
Brent barn ræðist eld, og tað kann vera tað, sum eyðkennir Høgna Hoydal í løtuni, at hann ikki risikerar, at eitt misálit frá honum enn einaferð endar við eini álitisváttan til løgmann. Men løgið tykist tað, at tað ikki skal bera til at reisa eitt misálit á eina samgongu, sum í veruleikanum bara hevur 13 tingfólk av 33.
Vit kenna væl øll tey góðu argumentini um, at so nógv góð mál liggja í tinginum, sum fella burtur, men tað skerst heldur ikki burt, at vit hava eina samgongu, sum als ikki er virkisfør.
Vit hava fleiri ferðir víst á, at Fólkaflokkurin hevur so stórt vald á hinum flokkunum. Og rætt er tað, at hann klárar merkiliga væl at halda Javnaðarflokkinum, Sambandsflokkinum og eisini Tjóðveldinum skákmát. Men tað er kanska øðrum at lasta, heldur enn Fólkaflokkinum, sum uttan iva bara ger hvat hann kann fyri at halda seg til maktina, sum politikkur í grundini snýr seg um. Men tá vit velja ein stjórnarleiðara, so er kravið til hann sera einfalt: Hann skal stýra, hann skal skera ígjøgnum, hann skal taka avgerðir.
Tað er tí, at Føroya Løgmaður hevur so stórt vald, at hann bæði kann koyra og seta landsstýrisfólk, sum tað passar honum og skriva út løgtingsval, tá tað passar honum. Hetta vald skal sjálvandi brúkast við skili – men hann skal eisini vísa, at tað er hann, sum ger av, hvar skápið skal standa, hann skal ikki lata seg kasta runt í maneguni, so sum hann hevur gjørt seinastu dagarnar. Og hevur hann mist sítt parlamentariska grundarlag, so er at taka støðu út frá tí.
Traðka í karaktera, harra løgmaður, tað er tín uppgáva!
