Tað var ein fyrispurningur frá Kristinu Háfoss, tingkvinnu, sum hesaferð festi í kjakið um lønirnar hjá politikarum. Tað vísir seg at vera sera trupult hjá politikarum at taka burtur sera órímuligar ágóðar, sum teir sjálvir fáa. Tá eru undanførslurnar nógvar. Ólíka lættari er at skerja rættindi hjá til dømis pensjónistum og vanligum lønmóttakaranum. Tá eru ikki so nógv fyrilit at taka, tí tey fáa ikki mótmælt so hart, sum politikararnir sjálvir. Tað kemur ikki nøkrum løgtingsmeiriluta til hugs at taka tær 13.600 krónurnar, sum landsstýrismenn sum Karsten Hansen, Bjørn Kalsø, Jacob Vestergaard og Johan Dahl fáa skattafrítt – bara tí teir hava adressu á bygd.
Av tí at eingin hevur rygg til at skera ígjøgnum, so er Kaj Leo Johannesen sum løgmaður millum tey landsstýrisfólk, sum tjena minst. Meðan teir omanfyrinenvdu fáa góðar 65.000 krónur útgoldnar um mánaðin, har teir bara gjalda skatt av 49.000 krónum, so fær løgmaður »bara« slakar 65.000 krónur á sína konto. Men hann skal gjalda skatt av 58.000 krónum, tí hann hevur adressu í Havn. Tað vil siga, at hesir fýra landsstýrismenninir hava einar 5-6.000 krónur meira í nettoløn, enn arbeiðsgevarin hjá teimum, sum er løgmaður.
Tað mátti ikki verið neyðugt at sett nevndir í hópatali at finna út av, at hetta er ein sera órímulig skipan. Var skomm skapt í tingmonnum, so var hendan út av lagi órímuliga – fyri ikki at siga korrupta – skipan tikin av alt fyri eitt!
– Eg haldi, at tað er neyðugt at gera broytingar, men vit eiga at virða okkara starv, tí vit gera øll eitt gott arbeiði, segði løgmaður í tinginum mikudagin.
Valla er nakar ímóti, at løgmaður og landsstýrisfólk skulu verða væl lønt. Men alt við máta. Av tí at politikarar sjálvir áseta síni egnu lønarviðurskifti, so hevur tað eydnast teimum at fáa sær so góð pensjónsviðurskifti, at teir fáa fulla pensjón eftir átta árum, meðan onnur tænastufólk skulu arbeiða í 37 ár fyri at fáa rætt til fulla pensjón.
Skuldu landsstýrisfólk sjálvi goldið til sína pensjón – so skuldi lønin verið um 100.000 krónur hægri um mánaðin!!!
Kanska er lønin lág – men pensjónin man vera millum heimsins bestu.
