Løgmaður hevur kallað samgonguna saman í dag, har hann vil hava lagnuna hjá Skálafjarðartunlinum avgreidda: Nú sigur løgmaður, at hann vil kanna, um tað ber til at samansjóða øll tunnilsuppskotini til eina felags verkætlan, sum allir flokkar kunnu taka undir við.
Bylgjurnar ganga høgt innanborða í samgonguni. Tað er eyðsæð fyri øllum. Menn eru rættiliga í hornatøkum innanfloks, og tí tænir tað ongum endamáli hjá løgmanni at blíva við at royna at trýsta tunnilsloysnina hjá Kára P. Højgaard í gjøgnum. Hetta veit løgmaður, og hetta sær løgmaður. Tì saðlar hann nú til tess at varðveita politiska takið so nøkulunda.
Løgmaður hevur vart uppskotið hjá Kára P. Højgaard hundrað prosent, og hann hevur sagt, at tað ber ikki til hjá tí almenna at fara undir verkætlanina, tí tað ber búskapurin ikki.
Tá ein stjórnarleiðari soleiðis kemur í minniluta – og hansara uppskot verður felt av hansara egnu, so hevði verið nærliggjandi at hildið, at støðan hjá stjórnarleiðaranum sjálvum var í vanda. Hevur tingið álit á arbeiðsháttinum hjá løgmanni, kunnu vit spyrja. Tað er so spurningurin, sum samgongufelagarnir hjá løgmanni helst fara at greiða í dag.Spurning
urin er so bara, hvussu langt tað ber.
Men hóast privata ætlanin hjá løgmanni og Kára P. Højgaard hevur fingið mønustingin, so er eingin innantings sum mutar ímóti, at einasta og absolutta loysnin er ein tunnilin millum Havnina og Skálafjørðin. Hví er øll tann politiska skipanin so blendað í hesum eina møguleikanum? Hví verður ikki spurt nærri um til dømis ætlanina hjá Frank Hansen, verkfrøðingini, sum í Sosialinum í februar í ár greiddi frá, hvussu vit við hepni kundu binda fleiri fólk í Føroyum tættari saman við eini alternativari loysn við nýggjum sambandi tvørtur um Sundalagið og við tunli millum Selatraðarleiðina og Skálabotn og Skálabotn og Gøtudal. Ein ætlan, sum kann gerast í fleiri stigum, við minni váða og av føroyskum entrepenørum.
Tað er tó ikki í lagi, at eitt so »lítið« mál, sum hetta, skal blenda alla ta politisku skipanina, sum hevur so nógv stór mál, sum liggja á láni: Boykott frá ES, fólkaminking við tómum skúlum og barnagørðum og eldraøkinum upp eftir enda.
Her er okkurt rívandi galið!
