Tað var her í blaðnum fríggjadagin, at Jóannes Eidesgaard í tíðargrein vísti á, at vit áttu at havt ein greiðari politiskan pall, har valið antin stendur ímillum ein borgarligan høgravendan politikk ella ein meira sosialin og samhaldsfastan vinstravendan politikk.
– Hetta vildi givið veljaranum ein møguleika at valt ítøkiligan politikk heldur enn meira ella minni tóm vallyfti.
So far so good, kunnu vit siga. Gamaní er tað soleiðis í øðrum londum, at fólk vita frammanundan, hvørjir møguleikarnir eru. Sum oftast eru tvinnir møguleika, ein javnaðarstjórin ella ein borgarlig stjórn. Í Danmark er valið millum Vinstraflokkin og Javnaðarflokkin, í eitt nú Bretlandi millum javnaðarflokkin Labour ella konservativa flokkin.
Men soleiðis er ikki Føroyum. Her hevur tú ikki ánilsi av, hvørja stjórn vit fáa, um vit velja Aksel, Høgna, Jørgen ella Kaj Leo. So tí hevur Jóannes Eidesgaard rætt í, at tað hevði verið greiðari fyri veljaran.
Men so er spurningurin um flokkarnir eru klárir at taka eina slíka støðu. Vit kunnu fyrst spyrja, hví Jóannes Eidesgaard ikki sjálvur gjørdi tað. Tað síðsta hann gjørdi saman við Tjóðveldinum, var at grýta tey á dyr í Tinganesi av stríði um eina hurð og velja Kaj Leo Johannesen til løgmann. Sæð úr sjónarhorninum hjá Jóannes Eidesgaard, man tað verða býttasta gerð, hann hevur gjørt í sínum politiska lívi.
Aksel Johannesen hevur tó gjørt so mikið bart, at hann hevur útlokað samstarv millum Javnaðarflokkin og Fólkaflokkin. Tað er ein politisk satsing, tí hann setir seg sjálvan og formanssessin í veð. Hann kann tí ikki ganga sum Høgni Hoydal í oyðimarkargongd í fleiri valskeið. Um hann ikki megnar at fáa í lag samstarv við Tjóðveldi ella Sambandið, so er hann í trupulleikum – og tað kann vísa politiskt dirvi fram um breyðpolitikk.
Tjóðveldi fær ikki útilokað Fólkaflokkin, hvussu fegin tey vilja. Við at útiloka ultra konservatismuna hála tey teppið undan sær sjálvum. Tí er Fólkaflokkurin eitt »must« fyri Tjóðveldið. Hann er eksistensgrundarlagið hjá Tjóðveldinum.
Aksel kann fara báðar vegir. Hann kann samstarva við Tjóðveldi og royna at vinna atkvøður frá sambandsveljarum. Ella kann kann samstarva við Sambandið og royna at vinna atkvøður frá tjóðveldisveljarum.
Tí hava hvørki Høgni ella Aksel ráð at sasta upp á reyða kabienettið.
