Edmund Joensen vísir á, at skattakrónur í milliardaklassanum komandi fáu árini skulu setast í fleiri tunlar og í uppaftur meira asfalt og betong.
– Hetta vita samgonguflokkarnir, ið nú siga seg umhugsa, hvussu fígging skal útvegast til tiltøk fyri at skapa fólkavøkstur. Flokkarnir hava longu sjálvir prioriterað tunlar og betong fram um vitan, fólkavøkstur og menning. Spurningurin er, um reellur politiskur vilji er í landsstýrinum til at gera tað rætta: taka part av pengunum frá tunlum og betongi til frama fyri bráneyðugar íløgur í fólkavøkstur.
Og vit kunnu bara vera púra samd við fólkatingsmanninum, tá hann reisir spurningin, hví tað var so umráðandi hjá landsstýrinum at samtykkja fíggjarkarmanar bara nakrar fáar dagar áðrenn hendan heildarætlanin varð løgd fram. Ein heildarætlan, sum landsstýrið sjálvt hevur biðið um til tess at viðgera spurningin, sum sambært løgmanni er størsta avbjóðingin hjá føroysku tjóðini, fólkaflytingin.
Bólkurin, sum hevur gjørt heildarætlanina sigur um tilgongdina til ætlanina, at nógv hevur verið frammi um fólkaflyting sum tað stóra álvarsmálið:
– Á sumri 2012 legði Javnaðarflokkurin eisini eitt uppskot til samtyktar fyri Løgtingið um at seta í verk tiltøk til at venda gongdini við fráflyting og minkandi fólkatali í Føroyum. Hesum tók Løgtingið undir við, og er breið semja um, at tiltøk skulu til fyri at skapa fólkavøkstur. Í oktober 2012 setti Johan Dahl, landsstýrismaður í vinnumálum, ein arbeiðsbólk at gera eina heildarætlan um fólkaflyting og fólkavøkstur, ið skuldi vera liðug 1. apríl 2013.
Altso: Løgtingið samtykkir eitt uppskot til samtyktar frá einum andstøðuflokki. Vinnumálaráðharrin má so taka málið upp, og tað ger hann við at seta hendan arbeiðsbólkin, sum skal leggja sítt álit fram fimm dagar eftir, at fíggjarkarmarnir komu fram.
Um landsstýrið ikki tekur heildarætlanina í eitt sindur størri álvara, men viðgerðin higartil hevur bent á, so verður talan helst um einn eitt skuffuálit í Tinganesi.
Okkara vón er, at landsstýrið torir at gera tað rætta!
