Søgan er í stuttum tann, at SEV hevði tríggjar vindmyllur í Neshaga av danska slagnum Vestas. Hetta eru sama slag myllur, sum Vindrøkt hevur í Vestmanna, har eisini tríggjar eru. Í januar og í mars í fjør brotnaðu tvær av myllunum í Neshaga, og í august var tann triðja tikin niður. SEV hevur keypt nýggjar myllur av slagnum Enercon, sum ikki hóska at brúka saman við Vestasmyllum. Tað var í hesum sambandi, at Vindrøkt hevði ein fyrispurning hjá SEV, um felagið kundi yvirtaka hesa mylluna og seta hana upp í Vestmanna. Men her var svarið eftir øllum at døma eitt tvørt nei.
Sambært nevndarformanninum í SEV, so eru Vindrøkt og SEV í kapping – og hann heldur eisini, at um SEV vinnur privata vindmyllufelagnum neisir, so er tað ein vinningur fyri Føroya fólk, hvussu tað so skal skiljast.
Hjá Vindrøkt hevði hetta merkt, at felagið kundi framleitt grøna orku við hesi myllu, sum kundi spart 2,2 milliónir krónur í oljuútreiðslum hjá SEV.
Tað kann so ongantíð vera ein fyrimunur fyri Føroya fólk, at hendan myllan liggur niðurpakkað uppi í haganum norðuri á Eiði, heldur enn at hon framleiddi grønan streym í Vestmanna.
Og fyri brúkaran er tað líka mikið, um eitt privat felag kann tjena pengar upp á at selja streym inn á neitð hjá SEV, heldur enn at SEV brennir olju uppi á Sundi og framleiðir dýrari streym og dálkar náttúruna.
Hvør er trupulleikin við, at privatir veitarar lata streym inn á netið hjá SEV? Er tað ikki bara gamla monopolskrímslið, sum kommunalpolitikarar so gjarna vilja varðveita? Hevði tað ikki verið ein loysn at latið eitt sindur upp her? At latið onnur sloppið at framleitt streym inn á netið?
Søguliga sæð, so hevur SEV stríðst ímóti vindmyllum í Føroyum. Tað bar ikki til, segði SEV. Men tað ber til, og tað ber eisini til hjá øðrum, enn hjá SEV.
Tað, sum hevur týdning fyri brúkaran er, at hann fær bíliga orku – og tá grøna orkan er bíligari, so fær náttúrin eisini vinningin – so áttu øll at verið glað.
