Verður boringin í lisensinum 204/16 í bretskum øki ein fulltreffari tvs. vísir hon, at oljufeltið, sum Hess fann í fjør, er so stórt, sum vónir og illgruni eru um, so kann hetta sjálvandi fáa alstóran týdning fyri føroyaøkið og her ikki minst fyri vinnuna á landi í Føroyum, sum so smátt hevur gjørt seg út til nýggju avbjóðingina. Hetta kann koma at fáa avleiðingar fyri tann rikna politikkin á nógvum økjum. Men gongur tað hinvegin og vísa kanningarnar, at talan er ikki um eitt lønandi fund antin tí at tað er ikki nóg stórt ella tí, at umstøðurnar at fáa oljuna upp ikki eru tær røttu, so kann hetta eisini koma at tarna leitingini á føroyaøkinum.
Tað er greitt, at tríggir brunnar boraðir í einum nýggjum øki geva ikki nakað endaligt svar, men er einki lønandi fund fer tað heilt givið at gera, at oljufeløgini fara ikki at raðfesta Føroyaøkið eins høgt sum tey hava gjørt tað higartil. Hinvegin hava oljufeløgini bundið seg til at bora fleiri brunnar, og tær boringarnar verða so næsta ár og í 2004 og 5. Her er talan um fimm brunnar aftrat.
Nú eiga vit sjálvandi ikki at fella í fátt, tí talan er bert um eina byrjan. T.d. vita vit als ikki, hvat stóra økið undir basaltinum kann goyma. Og hyggja vit at gongdini vestan fyri Hetland, so vóru boraðir meira enn 70 brunnar har, áðrenn lønandi fund varð gjørt. So hetta vísir, at vit mugu gera okkum út við toli. At tað kemur illa við hjá vinnuni, sum kanska hevur verið í so bjartskygd, er so nakað vit mugu læra okkum at liva við. Tí er tað eisini so týdningarmikið, at hvørki vinna ella samfelag í verandi støðu gera størri íløgur í eina komandi oljuvinnu, men heldur fara varðliga fram og fyribils hava hesa vinnu sum eitt íkast. At tær brynja seg út og førleikamenna seg til hesa nýggju vinnu er tó ein sjálvfylgja, men soleingi einki lønandi oljufund er gjørt eigur alt samfelagið at vísa størsta varsemi og hógv.
Sosialurin
