ODDAGREIN: Latið tunnilin bíða

Og meira vit hugsa um tað, so er tað sera løgið, at meginparturin av løg­ting­i­num fer upp á gartera, tá nakr­ir ein­stak­ling­ar koma við einum góð­um hug­skoti um at gera tunnilin undir Tanga­firði av Nesi til Havnar.

Sjálvandi hevur ein slík verkætlan nógv spenn­andi perspektiv í sær, men alfa og o­mega fyri in­fra­struk­tur­in í Før­oy­um er ikki, hvussu skjótt tað skal vera at koma av Toftum til Havnar.

Og bara tað, at lokalir tingmenn há­lova púra ókritiskt eini slíkari verk­ætl­an og garantera, at hetta er tað besta, eigur at fáa tey, ið evsta vald hava, at um­hugsa hetta av nýggjum. Húsa­gang­urin hjá Eik Banka legði fyri­bils fót fyri verkætlanini, og hann verður helst eisini høvi til, at løg­tingið nú kann endavenda øllum máli­num.

Verkæltanin er kanska eitt úrslit av sín­ari tíð, tá bankastjórar og advo­k­at­ar kundu lokka skipseigarar til handl­ar í hundraðtalsmillióna klass­anum. Hví so ikki gera ein tunn­il fyri eina milliard? Og tá so nevnd­ar­lim­ir­nir fingu nakrar hundraðtúsnd krón­ur í partapeningi eisini, so áttu øll at ver­ið glað... ella hildu vit, at trøini vuksu inn í himmalin?

Ting- og landsstýrisfólk við á­byrgd eiga nú at hugsa seg um av nýggj­um. Øll eiga sjálvandi at lesa grein­ina hjá Frank Hansen, har hann eitt nú vísir á, at við at gera eina aðra høvuðs­farl­eið á meg­in­øki­num, sum stytt­ir far­leið­ina úr Havn til Gøtu, Fuglafjarðar, Leir­vík­ar og Norð­oyggj­ar líka nógv sum Skála­fjarð­ar­tunn­il­in - og at tað fer at taka 35 min­uttir at koyra úr Havn til Klaks­vík­ar. At far­leiðin fer at ganga í­gjøgn­um seks av teim­um ætlaðu níggju komm­unu­num. At íløgan kostar 675 mió kr. At ork­u­nýtsl­an verður minni, tí tað verða færri brekkur, at raksturin verð­u­r bíligari, og at øll ætlanin ikki nýt­ist gerast í senn.

Landið eigur sjálvandi ikki at lata privat­um eina so stóra verkætlan so­leið­is upp á gjøt. Bara tað at mál­ið verður eitt stríðsmál millum norð­oy­ing­ar og vágafólk móti hinum sig­ur, at málið er als ikki búgvið. Sjálv­andi skulu vit øll vera felags um út­reiðsl­ur­nar av samferðslunetinum, og ein slík verk­ætl­an, sum Skálafjarðartunnilin, skal sjálv­andi verða partur av eini skila­góðari landsætlan, so ein so stór íløga kemur at gagna øllum landi­num.