Um talan er um lønarbatar, so fevnir lógarbroytingin altíð um tey, sum nú eru í skipanini. Men er talan um lønarlækking ella eitthvørt, sum ikki er teimum til fyrimunar, so verður lógin galdandi fyri tey, sum verða vald næstu ferð.
Soleiðis er eisini við uppskotinum hjá løgmanni um broytt lønar- og eftirlønarviðurskifti hjá landsstýrisfólki.
Løgmaður kendi sær áneyðir mánadagin at senda út tíðindaskriv frá Løgmansskrivstovuni, har hann í stórari yvirskrift segði, at »Landsstýrisfólk fáa verri sømdir«.
Tað sær sjálvandi ikki pent út, at løgmaður hækkar sína egnu løn 30 prosent, meðan hann ikki unnar pensjónistunum neyðars 200 krónur í hækking.
Men er tað nú rætt, at Kaj Leo Holm Johannesen og hansara fólk í Tinganesi fáa verri sømdir? Løgmaður stendur til at fáa eina klekkiliga lønarhækking úr 58.527 krónum upp í 76.085 krónur. Tað er ein munur upp á 17.558 krónur.
Løgmaður leggur miðlarnar undir einans at vilja gera rámandi yvirskriftir og ikki seta seg ordliga inn í uppskotið, sum hevur stórar sparingar við sær, sigur løgmaður.
Men lat okkum hyggja, hvussu nógv tað sparir, um vit taka verandi manning í Tinganesi sum dømi:
Løgmaður hevur longu vunnið sær fulla pensjón upp á 60 prosent av løgmanslønini frá tí hann fyllir 67 ár. Hann fær kortini lønarhækking upp á 17.558 krónur um mánðin. Sparingin í pensjón til løgmann er 0 – skrivað NULL – krónur.
Tað sama er galdandi fyri Johan Dahl, fyri Bjørn Kalsø, fyri Jørgen Niclasen, fyri Jacob Vestergaard, fyri Karsten Hansen og fyri Anniku Olsen – treytað av, at hon situr í landsstýrinum í eitt ár afturat.
Løgmaður og hansara manning hava tryggjað sær síni pensjónsviðurskfiti, áðrenn tey bera uppskotið niðan í tingið. Landskassin sparir ikki eina krónu í pensjónskrónum til hesi landsstýrisfólk. Men tað kundi landskassin gjørt, um løgmaður hevði verið fyrr á sjóvarfallinum og bar uppskotið níðan í tingið longu í 2008, tá hann tók við sum løgmaður. Uppskotið lá klárt í skuffuni hjá honum, tá hann tók við. Og hann hevur síðani fingið tvey álit afturat.
So heldur enn at leggja miðanar undir at vera óseriøsar, so átti løgmaður at avgreitt hetta málið á ein virðiligan hátt.
