At málið um konkursraktu feløgini hjá løgmanni er vorðið til eina gølu kemst av, at løgmaður – eftir at hann í einum lesarabrævi á Vágaportalinum varð lagdur undir at hava páført tí almenna tap gjøgnum síni partafeløg – blankt noktaði fyri hesum. Hann gjørdi seg soleiðis sekan í at siga ósatt fyri Vágaportalinum, fyri Sosialinum og fyri Rás2, sum spurdu um málið.
Tá vit á Sosialinum fingu fleiri ábendingar um, at tað ikki passaði, sum løgmaður segði, bóðu vit um alment innlit í málið. Her komu vit eftir, at sera lítið skil var í feløgunum hjá løgmanni. So lítið, at eingin búroknskapur varð gjørdur fyri nakað av feløgunum – uttan Sp/F Sisero. Í búnum eftir hetta felag var tó ikki so nógv at koma eftir, tí kravánararnir fingu bert 5,7 prosent av tí, teir áttu til góðar. Í hinum feløgunum fingu kravánararnar als einki. Tey vóru øll avtikin sambært grein 143 í konkurslógini – sum er fyri »selskab uden midler«.
Í fyrstu syftu fingu vit bert innlit í búroknskapin hjá Sp/F Sisero, tí Sosialurin átti pengar tilgóðar har. Vit bóðu løgmann um innlit í hini feløgini, men hesum sýtti hann. Tá vit so vístu honum búroknskapin hjá Sisero, so gjørdist hann ikki sørt ilskur inn á Sosialin, tí hann hevði als einki við hetta felag at gera, segði hann.
Vit gjørdu hann sjálvandi varugan við, at hann sum nevndarformaður hevði fulla ábyrgd – og spurdu, um hann ikki visti tað? Men Kaj Leo Johannesen stóð fast við, at hann sum minnilutaeigari í hesum felag onga ávirkan hevði havt.
Løgmaður hevur eisini fleiri ferðir skrivað á Facebook, at Sosialurin hevur skrivað ósatt í hesum máli, og hann hevur speirikið Sosialin við at kalla blaðið »javnaðarblaðið«. Hvør skal siga: Við at vísa á, at løgmaður hevur misskilt og misrøkt sína ábyrgd sum nevndarformaður og kostað landi og øðrum pengar, so rennir tú politisk ørindi fyri mótstøðuflokkar hjá løgmanni...
Men tá løgmaður í Degi og Viku hoyrdi løgfrøðingin Kristinu Samuelsen siga tað sama, sum Sosialurin hevur sagt: At løgmaður á ongan hátt kann skáka sær undan ábyrgd, tá blotnaði løgmaður og viðgekk, at hann ikki hevði røkt sínar skyldur.
Trúvirðið hjá løgmanni hevði ikki fingið so stóran skaða, um hann segði sannleikan beinanvegin.
