Ofta tykjast fólkafloksmenn eisini at látast sum um, at teirra uppgáva er rudda upp eftir øðrum, áðrenn teir fáa sett veruligan fólkaflokspolitikk á skrá.
Men veruleikin er kortini tann, at Fólkaflokkurin hevur havt valdið so mikið leingi, at øll upprudding tí er eftir Fólkaflokkinum sjálvum.
Taka vit tey seinastu 40 árini, so hevur Fólkaflokkurin sitið í landsstýrissamgongu næstan øll árini – umleið 32 ár til samans. Vit skulu næstan 30 ár aftur fyri at finna eitt heilt valskeið, har Fólkaflokkurin hevur sitið uttan ávirkan – tað var valskeiðið 1984-88.
Hinir stóru flokkarnir hava allir havt sínar oyðimarkargongdir. Javnaðarflokkurin frá 1996-2004, Sambandsflokkurin frá 1998-2004 og Tjóðveldi síðani 2003.
So havandi hetta í huga, so er Fólkaflokkurin ultimativt tann flokkurin, sum hevur havt størstu ávirkanina á rikna fíggjarpolitikkin seinastu 40 árini.
Og hvat hava vit so fingið burtur úr tí? Øll hava tosað um, at hallið á fíggjarlógini skuldi verða burtur í 2015. Hetta var so broytt til 2016 – og nú hevur Jørgen Niclasen aftur broytt hetta til 2017. T. v. s, at so hvørt sum javnvágin nærkast, so verður trupulleikin skumpaður longur fram.
Hallið í ár, sum sambært Jørgen Niclasen skuldi verið 243 millionir endar á nærum tí tvíflada – á 449 milliónum krónum. Hetta er eisini nógv meira enn í 2011, tá hallið var 322 milliónir krónur.
So kann fíggjarmálaráðharrin tosa um teknikk og grundrakstur. Men tað visti hann eisini, tá tølini vórðu sett í fíggjarætlanina fyri 2013.
Slíkur orðavavstur er ikki júst álitisvekjandi. Úrslitið tosar sítt egna mál – og tað bendir á, at fíggjarpolitikkurin hjá Jørgen Niclasen og samgonguni ikki er hepnaður serliga væl.
Spurningurin er so, um vit kunnu líta á, at tað skal hepnast sama flokki – sum stýrt hevur seinastu 40 árini – at minka undirskotið til 250 milliónir næsta ár?
