At Saddam Hussein er ein ráður og harðrendur einaræðisharri, ið kúgar sítt egna fólk er als eingin ivi um, at hann hevur byrjað tvey kríggj er alkunnugt, og er hann tískil ikki heimsins mest álítandi statsleiðari, men er hann førur fyri at hótta vesturheimin ella heimsfriðin? Tað er ein stórur spurningur, og var hann smettin betri, tá hann var i samgongu við USA? Tað er jú ikki stórt meira enn 10 ár síðan, at Saddam var kelivætti vesturheimsins í Miðeystri. Hann var í kríggj við erkafíggindan, ið tá var Iran. Hann varð undirdíktur í pengum og vápnahjálp. Men so gjørdi hann tað dáraverk at herseta Kuwait, ið var uppaftur betri sameindi hjá USA, enn Saddam hevði verið, og so fall hamarin. Restina av søguni kenna vit. Spuringurin er bert, um trupulleikarnir í Miðeystri verða loystir við at lopið verður á Iraq. Vit ivast. Eitt álop á Iraq fer at loypa ólag á alt Miðeystur. Harnæst fer tað at seta ilt millum kristna og muslimska heimin og at gera skilnaðin millum hesar uppaftur størri. At fara í kríggj er altíð ein sera álvarsom avgerð ? tað kann seta alt Miðeystur í brand. Størsti trupulleikin í Miðeystri er ikki Iraq, men óloysta stríðið millum Ísrael og palestinensar. Fyrr enn hetta stríð er av, verður eingin friður, uttan mun til hvat USA annars ger við Iraq.
USA hevur sum heimsins sterkasta land stóra ábyrgd og skyldu mótvegis heiminum. USA kann ikki loyva sær at loysa uttanríkis- og trygdarpolitiskar spurningar bert út frá sínum egnu áhugamálum og við hermegi. Soleiðis sum gongdin hevur verið eru alt fleiri, ið eru farin at ivast, um Bush er nóg búgvin at leiða eitt so stórt og sterkt land sum USA. Málbrúk og atburður hansara týðir ikki uppá búnaðskap og fatan av heiminum, sum hann veruliga er samansettur, men heldur sum Bush og hansara ráðgevar vilja síggja hann. Ráðgevarnir eru frá faðirsins tíð. Teir tykjast ikki at kunna liva uttan fíggindar, og tí freistast man at hugsa, at ein orsøk til krígsøsingina eru vaksandi heimligu trupulleikarnir. Tað gongur av skriðuni við búskapinum, prísirnir falla í keypsskálunum og miðskeiðisval stendur fyri durum. Veljarakanningarnar eru ikki bjartar fyri Bush og flokk hansara, tí ræður um at avleiða huga veljarans frá trupulleikunum á heimavølli. Tí ber hann seg at sum ein cowboy í einum vánaligum westernfilmi, sum Al Gore tók til. Heldur enn at elva til krígsøsing áttu USA og Bretland at stuðla ST í vápnaeftirlitsloysnini. Hon stendur og fellur við, at hesi stórveldi stuðla hesi av fullum huga. Harnæst átti USA av fullum huga at farið inn í friðartilgongdina í Palæstina. Einki annað land megnar at skapa frið uttan USA. Clinton var komin væl á leið við eini friðarætlæn, tá Bush kom til valdið. Bush átti at tikið henda trupulleika í álvara. Við friði millum Ísrael og palæstinensar hevði friður fallið yvir Miðeystur og Saddam og aðrir einaræðisharrar høvdu hvorvið so at siga av sær sjálvum.
Sosialurin
