Ein nýggjur kommunubygnaður hevur verið á skrá leingi, men lítið og einki er hent seinastu 20 árini. Tosað hevur verið um at leggja ábyrgdarøki út til kommunurnar, eitt nú eldraøkið og skúlaøkið. Men tað er bara ikki hent. Gamaní hava fleiri kommunur sjálvbodnar lagt saman, men tað hevur einki við politikkin hjá teimum skiftandi landsstýrunum at gera – tað hevur verið gjørt av skynsamum og uppløgdum orsøkum, sum hava gagnað báðum pørtum.
Tað sigur seg sjálvt, at tríati kommunur er alt ov mikið til okkar lítla samfelag. Bara raksturin av øllum hesum kommunuumsitingum – við hvør sínum borgarstjóra – er ein tung og púra óneyðug byrða hjá fleiri teirra.
Tí var tað kærkomið, nú tað kom har til, at landsstýrið fór at spyrja fólkið, hvussu kommunurnar skuldu leggjast saman. Men fólkaatkvøðan tann 3. mai í ár man vera ein tann mest jánkaliga, vit nakrantíð hava havt. Hon minnir kanska ikki sørt um hana, sum var fyri neyvt 66 árum síðani í dag ? ella um hana, sum skuldi verða 26. mai í 2001, men sum Anfinn Kallsberg, fyrrverandi løgmaður, avlýsti í tøkum tíma, tí hann var bangin fyri, at hon fór at binda okkum fastari í ríkisfelagsskapinum.
Og tað er júst tað, sum hendi. Tann illa fyrireikaða fólkaatkvøðan hjá landsstýrinum fekk ikki fólk á val, tí tey vistu rætt og slætt ikki, hvat fólkaatkvøðan gekk út uppá. Tískil er støðan meira fastlæst nú, enn hon var, um eingin fólkaatkvøða hevði verið.
Tað sigur seg sjálvt, at vit skulu hava størri kommunalar eindir, men úrslitið av fólkaakvøðuni bleiv, at vit bara skulu hava tríggjar kommunur færri. Tað ger so púra ongan mun. Skulu vit leggja kommunur saman, so tað munar, so skulu vit niður á nakrar heilt fáar komunur, sum kunnu teljast á einari hond.
Kommunurnar kring landið mugu helst sláa seg til tols við, at tað verður ikki løgtingið ella landsstýrið, sum fer at leggja tær saman. Til tess er politiska skipanin alt og stirvin og alt ov ryggleys. Landspolitikararnir tora ikki at taka eina slíka støðu. Tí mugu kommunurnar halda fram við tí meira ella minni tilvildarliga samanleggingarpolitikkinum, sum hevur verið framdur seinastu árini.
Og tað er spell, tí best var um leisturin var skilagóður og greiður.
