Fyri so vítt er hetta sama modell, sum vit hava hoyrt áður. Jóannes Eidesgaard var eisini skjótur úti við sínari hugsan – at hesin leisturin »fekk málið um Skálafjarðartunnilin aftur á beint«.
Tað er kanska ikki so løgið, at partar av politiska myndugleikanum ikki eru so heitir fyri, at ein slík samferðsluútbygging verður gjørd á privatum grundarlag. Eisini tað, at nevndarlimir í felagnum høvdu útvegað sær persónlig partabrøv fyri fleiri hundrað túsund krónur skapar politiska mótstøðu. Og illa var, um slíkt ikki elvdi einum slíkum felag mótstøðu.
Hinvegin so er tað eisini ein herskin biti hjá vágafólki og norðoyinum at svølgja, at teirra tunlar ikki verða ókeypis at koyra ígjøgnum, tá teir eru útgoldnir, soleiðis sum ætlað hevur verið. Tí er hetta sjálvandi ein trupulleiki, sum ikki er so heilt einfaldur at loysa. Men eyðsæð er, at møguleikin fyri at tað almenna má taka um endan, um verkætlanin skal gerast veruleiki, er til staðar.
Jóannes Eidesgaard nevndi, at vit eisini kunnu fara at taka tunnilsgjald fyri Kollafjarðartunnilin og brúgvagjald fyri brúnna um Streymin – og at vit eisini kunnu leggja eitt eykagjald á vegskattin, til tess at fíggja samferðsluútbyggingar. Álvaratos, Jóannes Eidesgaard, nú mást tú líka stýra tær. Eitt er tað, at fólk mugu liva við einum tunnilsgjaldi fyri undirsjóvartunlarnar. Hetta var prísurin fyri at sleppa at koyra heldur enn sigla, og gjaldið er eisini munandi lægri, enn tað var fyri at sigla. Men at taka gjald fyri at koyra um eina brúgv, sum er 40 ára gomul og ein tunnil, sum er 20 ára gamal, tað er jú beinleiðis at halda fólk fyri gjøldur. Og at fara at leggja ein eykaskatt á bileigarar, tað er í øllum førum púra hol í høvdið. Tí tá frátekur tú okkum valmøguleikan. Tá hava vit ikki eitt brúkaragjald, sum vit kunnu velja at sleppa undan, tá hava vit ein eykaskatt. So var betur, at vegskatturin varð avtikin, og at eitt gjald var lagt oman á brennievnið. So var tað tann, sum brúkti vegakervið, sum rindaði, og tað er væl saktans ikki annað, enn rímuligt.
At tað almenna tekur um endan, tað er í ordan. Men tað skal ikki seta hinar landspartarnar verri fyri.
