Tað má vera markleysur frekleiki og gramleiki út um alt mark, at ein maður, sum hevur sitið við evstu ábyrgd av Føroya Sparikassa og Eik Banka øll hesi árini, tá tann siðbundi og sterki peningastovnurin undir ábyrgdaleysari leiðslu varð rikin so í óføri, at fleiri milliardavirði fóru fyri skeytið.
Tað er ein veruleiki, at stjórarnir báðir hava fingið oman fyri 40 milliónir krónur í løn árini frá 2000-2011. Tá galskapurin toppaði í 2007 fingu teir 6.339.000 í ársløn tilsamans. Marner Jacobsen fekk 4.252.000 krónur, og Bjarni Olsen 2.087.000 krónur umframt aðrar ágóðar sum eitt nú frían bil og telefon.
Uttan iva hevur nevnd bankans hildið, at bankastjórarnir hava gjørt eitt gott arbeiði, men tað endaði altso ikki væl. Bankin fór á heysin av vanstýring og vánaligari leiðslu. Nevnd bankans fekk sama tíðarskeið yvir 13 milliónir krónur í løn – sum toppaði í 2009, tá nevndin býtti sær góðar tvær milliónir í løn.
Jú víst skulu fólk í leiðandi størvum hava góðar lønir, tí við góðu lønini fylgir eisini stór ábyrgd. Men tað er ikki júst ábyrgd, sum hevur eyðkent verkið hjá leiðsluni í Eik Banka – men tvørturímóti størsta ábyrgdarloysið, sum vit hava sæð í føroyska fíggjarheiminum.
Tað skríggjar eisini langan veg av inkompetansu, tá ein bankanevnd kann gera slíkar avtalur, sum nevdin í Eik Banka gjørdi við stjórarnar, sum fóru til hús við lyfti um 30 feitar mánaðarlønir í part – ella tilsamans um 12 milliónir krónur.
Tað er einki minni enn ein sjálvfylgja, at nýggja leiðslan í bankanum burturvísti stjórunum uttan løn. Hvat er tað, sum rættvísger, at frákoyrdu stjórarnir skulu hava eitt gylt lógvatak upp á 12 milliónir fyri at pádraga øðrum tap upp á fleiri milliardir?
Hevði tað av øllum illum verið fyri at savna pengar til børn o. o. sum vórðu lokkað at konvertera eitt nú dóps- og konfirmatiónspengar til partabrøv, so hevði tað kanska givið meining.
Men halda teir seg hava rætt til pengarnar, so er tað prógv um tað himmalrópandi ábyrgdarloysið, í ovastu leiðsluni, sum koyrdi Eik Banka á heysin.
