Sambært dagsins veljarakanning, so kann landsstýrissamgongan hjá Kaj Leo Johannesen notera sær ein stóra afturgond upp á níggju prosent. Og ein stjórn, sum stendur til so stóra afturgongd, hon er í stórum trupulleikum.
Tað er tað, sum tølini í nýggjastu veljarakanningini hjá Gallup Føroyum siga. Størstu afturgongdina hevur Fólkaflokkurin, meðan løgmaður og Sambandsflokkurin hava næst størstu afturgongdina. Andstøðuflokkarnir Tjóðveldi og Javnaðarflokkurin ganga tilsvarandi fram, sum Fólkaflokkurin og Sambandsflokkurin ganga aftur.
So kunnu vit spyrja, hvat ein slík kanning sigur.
Stóra málið í summar um Skálafjarðartunnlin – og ikki minst óhepna handfaringin hjá løgmanni í málinum hevur uttan iva sína ávirkan. Men tað valla tað málið, sum gevur Fólkaflokkinum so stóra afturgongd. Tí Fólkaflokkurin – og serliga formaður floksins – hevur als ikki verið við í kjakinum. Hann hevur valla enn svarað nøkrum spurningi um tunnilin.
Hinvegin kann tingsessurin, sum kanningin gevur Sjálvstýrisflokkinum, uttan iva góðaskrivast tunlinum og martyr-leiklutinum, sum Kári P. Højgaard fekk, tá lømaður offraði hann fyri at royna at skapa sær sjávlum politiskan frið.
Bera vit saman við aðrar kanningar, sum eru gjørdar síðani valið, so sæst, at Sambandsflokkurin hevur fingið eina lítla framgongd í mun til kanningina frá februar í ár, so sæð í tí ljósinum, so hevur flokkurin ikki mist atkvøður upp á Skálafjarðartunnilin.
Samanumtikið, so missir samgongan nógvar atkvøður, og andstøðan fær nógvar atkvøður. At tríggir tingsessir flyta frá samgongu til andstøðu ber boð um stór misnøgd millum veljararnar.
So kunnu vit kjakast um, hvat løgmaður kann nýta eina slíka veljarakanning til. Hann kann sjálvandi arbeiða víðari sum um einki var hent. Men tá Fólkaflokkurin liggur so lágt í mun til Sambandsflokkin, so kann tað geva løgmanni størri vald. Løgmaður kann trýsta Fólkaflokkin við at hótta við nývali. Eitt nýval nú hevði ikki verið gott fyri Fólkaflokkin.
Løgmaður kann betur nýta nýval sum trumf við hesi veljarakanningini.
