So bersøgin var formaðurin í Føroya Lærarafelag, Herálvur Jacobsen, í síðstu viku. Hann vísir á, at komandi skúlaár verða 300 undirvísingartímar um vikuna tiknir frá fólkaskúlanum, og miðfirraðu tímarnir minka úr 15 niður í 13 prosent.
Hann heldur, at hetta eru sera stórar sparingar, tá 1.000 tímar um vikuna longu vórðu tiknir síðsta ár.
Herálvur Jacobsen vísti eisni á, at í fjør varð sagt, at nú var skorið inn á bein.
Helena Dam á Neystabø, landsstýriskvinna í skúlamálum segði við Sosialin í november í fjør, at tey í Mentamálaráðnum tá longu høvdu spart tað, sum hon heldur at tað ber til at spara og tí skulu antin fleiri pengar til, ella umfatandi bygnaðarbroytingar til fyri at varðveita ein skúla á norðurlendskum støði.
Formaðurin í lærarafelagnum er komin til ta niðurstøðu, at vit ikki longur kunnu halda fólkaskúlalógina. Hann vísir á, at skúlaleiðslurnar sótu longu fyri hetta skúlaárið við svartaperi, tí tær høvdu ilt við at fáa alt at hanga saman, og nú er støðan bara versnað uppaftur meiri. Leiðslurnar skulu finna loysnir; ein máti er at leggja flokkar saman fyri at spara tímar, men flokkar við 40 til 60 næmingum er eingin haldbar loysn, sigur Herálvur Jacobsen.
Ilt er at vita, hvørjum vit skulu trúgva, tí landsstýriskvinnan var so bersøgin í nevndu grein í Sosialinum, at vann hon ikki ljóð fyri sínum krøvum, so fór hon at leggja landsstýrissessin frá sær.
Og lurta vit eftir formanninum í Føroya Lærarafelag, so er Helena Dam á Neystabø langt síðani komin har til, at hon – sambært sær sjálvari – skuldi leggja landsstýrissessin frá sær til frama fyri fólkaskúlan.
Men politikkur er so nógv. Oluf Palme segði, at politikkur er at vilja – og at vilja broytingar. Men um »broytingarnar« eru at slúka egnar kamelar og lata standa til, so er politikkur ikki nógv verdur. Og jú, tað er altíð vandamikið at lova ov nógv – sum til dømis at seta sína egnu politisku karrieru í veð.
Men at rokna við, at dagsins minnilutastýri í Tinganesi megnar at fremja ein skúlareform, ella at makrelsamgongan eisini blívur ein kommunu- og skúlasamgonga, sum megnar ætlaðu reformarnar, tað er kanska í so bláoygt.
Men kanska skuldu háttvirdu tingfólk komið niður á jarðarhædd og viðgjørt dagsins realpolitikk – sum til dømis føroyska fólkaskúlan, sum sambært læraraformanninum stendur fyri falli og lógarbroti.
