Hesaferð snýr tað seg um deplastjóran á eldradeplinum undir Almannaverkinum, sum er sendur heim við 712.000 krónum í løn fram til 1. mai næsta ár.
Tað er ikki meira enn eitt lítið ár síðani – tann 15. oktober í fjør – at boðað varð frá nýggjum leiðslubygnaði í Almannaverkinum.
Boðað varð frá, at arbeiðið nú skal skipast í fimm deplum: Viðskiftadepli, Menningardepli, Trivnaðardepli, Veitingardepli og Eldradepli.
Harafturat er stápurin skipaður við fíggjarleiðara, starvsfólkaleiðara, KT-leiðara og fak-leiðara.
Síðani tá er stjórin sendur til hús – eisini við feitari fráfaringarløn. Og nú hevur fyribilsstjórin í Almannaverkinum gjørt av, at skipanin við eldradepli skal niðurleggjast og deildarstjórin sigast úr starvi.
Sambært fráfaringaravtaluni, sum Sosialurin hevur fingið innlit í, eitur orsøkin bygnaðarbroytingar, tí at virksemið hjá Eldradeplinum er flutt inn undir Menningardepilin. Tí er starvið sum depilsstjóri fyri Eldradepilin verður niðurlagt.
Um tað er allur sannleikin, vita vit ikki. Men almannastjórin segði við Rás2 í dag, at hann við hesum »hevur skapt frið, so at arbeiðast kann víðari...«
Ikki tí, hetta er einki eindømi, sum aðalstjórin í Almannaráðnum, sum eisini er settur stjóri í Almannaverkinum, hevur gjørt. Hetta er púra vanlig mannagongd, tá almennir stjórar og almennir leiðarar verða sagdir úr starvi. Tá fáa teir ovurstórar og góðar fráfaringarlønir.
At talan heldur er um eitt sjúkt system heldur enn eina almanna leiðslu, sum ikki hevur virðing fyri skattakrónum, er tí eyðsæð.
Men hevði talan verið um fólkið á gólvinum, um heimahjálpir ella um vaskikonur í almannaráðnum, sum skuldu sigast úr starvi, so hevði eingin fráfaringaravtala verið gjørd. Teir fáu dagar, tær hava í uppsagnartíð, hevði uttaniva skula verið brúkt fult út til arbeiði, um tær skuldu gjørt sær tankar um at fingið løn.
Men høgur og lágur eru ikki líka. Og so slett ikki í okkara almennu skipan, har politikarar sjálvir ganga undan við at tiltuska sær sersømdir. Hví skulu alemnnir leiðarar so ikki eisini sleppa?
Bara fólkið ikki fær somu rættindi, so gongur tað nokk...
