Soleiðis siga floksformenn í tíðindaskrivi, teir sendu miðlum beint undan vikuskiftinum.
Vit onnur kunnu eisini fegnast um, hvussu politikararnir nú fegnast um, at tað loksins er funnin semja um, hvussu tunlarnir báðir, Skálafjarðartunnlin og Sandoyartunnilin skulu gerast og ikki minst fíggjast.
Tann loysnin, sum Jørgen Niclasen nú hevur gjørt saman við øll floksformonnum og floksleysa Gerhardi Lognberg, er júst tann sama, sum semja var um í CHE samgonguni á vári í 2008, men sum Gerhard Lognberg bumbaði í luftina við at fara úr samgonguni.
Men politiski veruleikin er jú relativur. Nú fegnast allir um hesa semju, sum sigur, at tað skal vera koyrandi ígjøgnum báðar tunlarnar í 2021. Sambært upprunaligu ætlanini hjá Che-samgonguni skuldi arbeiðið við Skálafjarðartunlinum fara í gongd í 2009 og koyrandi skuldi vera ígjøgnum í 2017.
Síðani skuldi Skálafjarðartunnilin fíggja Sandoyartunnilin.
Tá tað nú liggur í kortunum, at koyrandi skal vera ígjøgnum báðar tunlarnar í 2021 – og at ætlanin er júst tann sama, sum fyri seks árum síðani, so kunnu vit bara staðfesta, at arbeiðið hjá landsstýrinum – og teimum tingfólkum, ið hava hildið seg átt mest í verkætlanini, hevur verið av handahógvi merkt. Tí nú seks ár seinni eru vit komin líka vítt sum sítt.
Fyri politiska veruleikan í dag loysir tað seg hjá ávísum politikarum at siga sum Bill Justinussen:
– Latið okkum nú vera skilagóð og duga at geva øllum æruna...
Somu tankar hevur Alfred Olsen, sum eins og Bill Justiussen stuðla kollisjónskósini hjá Kára P. Højgaard í tunnilsmálinum.
Veruleikin er kortini tann, at ein stórur parturin av tingfólkunum hava fløkt hetta málið upp í ein ellibita – at politiska snildi hjá Jørgen Niclasen ikki kundi finna upp á aðra loysn upp á naggatódnina, enn at venda aftur til uppskotið hjá che-samgonguni frá 2008.
At tað er skilabesta loysnins munnu tey flestu vera samd við við teimum í. Men var hetta ikki eisini skilabesta loysnin fyri seks árum síðani?
