Hóast flokkurin er tann minsti av stóru flokkonum, so kann vísast á framgongd. Í formanstíðini hjá Akseli Johannesen hevur tað eydnast at stegðað eini at kalla niðurbræðing av flokkinum og venda afturgongd til framgongd – um enn hon meira hevur verið í veljarakanningum enn í praksis.
Frá at hava havt støðuna sum størsti og mest stjórnarberandi flokkurin í seksti-, sjeyti- og áttatiárunum og at vera nógv størsti flokkurin í 1990, broyttist støðan fullkomiliga.
Flokkurin – og eina mest fyrrverandi formaðurin Atli P. Dam, fingu skuldina fyri kreppuna í nítiárunum. Kreppan bleiv beinleiðis persónifiserað við Atla P. Dam – serliga av fakfelagsleiðarum, sum í staðin fyri at gera sína ávirkan í flokkinum vendu honum bakið við at stovna ein nýggjan verkamannaflokk, sum man vera eitt tað mest miseydnaða projektið hjá føroysku fakfelagsrørsluni.
Hóast serstakliga vánaliga úrslitið á valinum í 1994, so eydnaðist Javnaðarflokkinum at telva seg í samgongu – og at fáa fíggjarmál at umsita. Eitt sera umstrítt málsøki tá, sum Jóannes Eidesgaard tók á seg.
Men samstarvið við Sambandsflokkin skinklaði. Og tað gav at býta í 1996, tá Javnaðarflokkurin tók seg úr samgonguni.
Tað sigst fyri vist, at flokkurin var ivaleysur í, at Edmund Joensen fór at útskriva nýval. Lotið var við Javnaðarflokkinum, sum tevjaði politiskan vinning á valinum. Men valið kom ikki, og Edmund sendi boð eftir Fólkaflokkinum, sum hevur sitið við valdið síðani.
Hetta man vera ein tann býttasta politiska avgerðin hjá Javnaðarflokkinum, tí hann fór á oyðimarkargongd í átta ár.
Men í 2004 fekk flokkurin løgmann saman við borgarligu flokkunum. Eftir valið í 2008 fekk flokkurin aftur løgmann – nú saman við Tjóðveldi og Miðflokki. Har skinklaði samstarvið eisini og slitnaði upp á eitt lyklarhol í Tinganesi. Úrslitið varð, at flokkurin valdi Kaj Leo Johannesen til løgmann.
Enn ein taktiskur brølari, um vit hyggja gjøgnum javnaðarbrillur.
Tvær ferðir hevur flokkurin soleiðis telvað seg út í oyðimarkargongd – uttan nóg góða orsøk.
Avbjóðingin hjá Aksel Johannesen verður at telvja flokkin aftur í Tinganes at fáa ávirkan.
