Tað kostar pengar at fáa nýtt landsstýrið, tí fólk verða send til hús við høgum lønum
Tað kostar landinum 1,1 millión krónur eyka í ár, at vit hava fingið nýtt landsstýri. Tey sjey fólkini, sum sótu í landsstýrinum eru send til hús. Men tey skulu hava fulla løn restina av árinum og væl inn í komandi árið við.
Hóast landsins hægstu fólk ikki fáa so góða fráfaringaravtalu, sum til dømis landsins almenni banki í 2005 gav sínum stjóra – so standast eyka útreiðslur av útskiftingini.
Landsstýri og løgtingið hava vitað, at løgtingsval fór at vera í ár – og harvið hava tey eisini vitað, at eykaútreiðslur fóru at standast av tí. Men landsstýrið sum sat hevði ikki ætlað, at øll landsstýrisfólkini skuldu skiftast út.
Jørgen Niclasen og hansara fólk høvdu roknað seg fram til, at bara trý landstýrisfólk skuldu skiftast út – uttan at navn varð sett á tey. Tí er undirskot á hasi kontoini nú, og tí má Kristina Háfoss finna 1,1 milliónir krónur eyka í ár, soleiðis at roknistykkið gongur upp.
Landsstýrisfólkini, sum fóru aftur í Løgtingið, fáa eisini fulla bíðiløn. Tað vil siga, at Kaj Leo Holm Johannesen, Bjørn Kalsø, Jørgen Niclasen, Jacob Vestergaard og Annika Olsen fáa fulla løn úr landsstýrinum og fulla løn úr løgtinginum næstu mánaðirnar.
Men tað fáa nýggju landsstýrisfólkini ikki, tá tey einaferð koma í somu støðu. Tí tá tey kom aftur í tingið, verður løgtingslønin mótroknað landsstýrislønini.
