Herfyri var HM í gonguløgum fyri íslandsross hildið í Herning í Danmark. Føroyska landsliðið var umboða av Elin V. Tindskarð og Jóanis í Hoygarðinum.
Tey bæði hava fyrr luttikið í nógvum altjóða kappingum, og ofta hava úrslitini verið heilt góð. Tí vóru vónirnar ikki heilt ongar tá tey nú aftur skuldi royna seg. Tey vóru eisini næstan á heimavølli í Herning, har tey ofta fyrr hava dystast.
Hjá Elini V. Tindskarð gekk eisini væl, hon kom í B finaluna í greinini T2 Tølt, og hóast hon tapti finaluna, gjørdist hon nummar 10 til HM, ið má metast sum eitt framúr úrslit. Elin V. Tindskarð reið á hestinum Hølkvir frá ytra Dalsgerði.
- Hon var ikki heilt nøgd við sítt úrslit, hon hevði fegin vilja gjørt tað enn betri, men hetta vísir helst á eitt ítróttarfólk, ið veruliga vil nakað við sínari ítrótt, skrivar Føroya ríðingarfelag.
Jóanis í Hoygarðinum kom ikki í nakra finalu hesaferð, men vónirnar til hann vóru heldur ikki á heilt sama stigi. David Nordendal, formaður í Føroyskum íslandsrossafelag og nevndarlimur í Ríðisamband Føroya sigur, at tey eru heilt væl nøgd við avrikini hjá føroyska hópinum.
