Russiskar herdeildir og sameindir í Luhansk siga seg nú hava ræðið yvir einum triðingi av ukrainska býnum, Sievjerodonetsk, har eysturi í landinum.
Tað var í gjár, at russiskir stríðsvognar koyrdu inn í býin, sum ukrainski herurin higartil hevur havt ræðið yvir.
- Vit kunnu upplýsa, at ein triðingur av býnum nú er undir okkara eftirliti, sigur politiski leiðarin fyri loysingarlandslutin, Luhansk, Leonid Pasetsjnik.
Tað er statsliga russiska tíðindastovan, Tass, sum í morgun ber hesi tíðindi.
Sambært Leonid Pasetsjnik eru harðir bardagar í býnum í morgun, og hann ásannar, at russisku deildirnar fáa harða mótstøðu frá ukrainsku deildunum.
- Tað gongur ikki so skjótt, sum vit høvdu væntað, sigur Leonid Pasetsjnik.
Borgarstjórin í Sievjerodonetsk, Oleksandr Striuk, sigur, at russisk loft-og rakettálop hava oyðilagt 90 prosent av bygningunum í býnum.
- Tað eru bara 12.000 til 13.000 íbúgvar av 100.000 eftir í býnum.
Tíðindastovan NTB endurgevur borgarstjóran fyri at siga, at umleið 1500 sivilfólk í býnum eru dripin, men hetta tal er ikki váttað av óheftum keldum, verður lagt aftrat.
