Nú skulu øll, sum eiga skotvápn, skráseta seg hjá tí almenna.
Vápnalógin er broytt og tað merkir, at myndugleikarnir vilja hava eitt fullfíggjað yvirlit yvir, hvør eigur hvørja byrsu.
Tí skulu øll skotvápn verða skrásett áðrenn 1. januar næsta ár og tað skal gerast hjá Umhvørvisstovuni, sum umsitur skrásetingina.
Tað, sum skal skrásetast, er navn, p-tal og bústaður hjá eigaranum, og somuleiðis skal skrásetast, hvat slag av skotvápni, talan er um, modell og seriunummar.
Tey, sum selja skotvápn, skulu eisini skráseta øll skotvápn, tey hava til sølu og tann, sum selur eina byrsu, hevur skyldu til at skráseta nýggja eigaran, samstundis sum nýggi eigarin skal vátta, at hann hevur keypt byrsuna.
Sum vit skrivaðu í áðni, skulu øll, sum hava byrsu, eisini á vápnakeið og tá ið byrsan verður skrásett, skal nummarið á vápnaloyvinum eisini skrásetast.
Les eisini: Øll sum eiga byrsu skulu nú hava vápnaloyvi
