Taks kann veita bindandi svar uppá skatta- og avgjaldsspurningar nú Løgtingið hevur samtykt uppskot frá Jørgen Niclasen fíggjarmálaráðharra um broyting í løgtingslóg um Toll- og Skattafyrisiting
- Fyrr hevur tað verið so, at borgarar ella vinnulív ikki hava kunnað fingið vissu fyri skattligu avleiðingunum av gerðum. Við hesari lógarbroyting fáa vinnan og borgarin tryggari karmar at virka undir. Hetta er eitt ynski, sum hevur verið um í langa tíð, sigur Jørgen Niclasen, fíggjarmálaráðharri, í tíðindaskrivi.
Taks kemur framvegis at hava til uppgávu at vegleiða skattgjaldarar, men lógarbroytingin merkir, at Taks fyrr í tilgongdini kann taka endaliga støðu til slíkar spurningar. Partur av eftirlitsarbeiðinum kann tí flytast til vegleiðing.
Fyri skattgjaldaran merkir skipanin, at rættartrygdin kring skattingina verður styrkt, av tí at eitt bindandi svar frá TAKS veitir trygd fyri, hvussu ein gerð skattliga verður viðfarin.
Eitt bindandi svar bindur einans TAKS, og spyrjarin kann tí velja at síggja burtur frá tilsøgnini. Bæði innihaldið og ein seinni avgerð frá TAKS viðvíkjandi somu viðurskiftum kunnu kærast.
