Lagið er sera gott á Skála. Fótbóltsflaggskipið hevur verið í tungum sjógvi og ofta undir strikuni.
Í kvøld er Skála farið í summarfrí, og støðutalvan sigur, at Skála eftir fjúrtan umfør er omanfyri strikuna.
Orsøkin er tann, at tað í kvøld eydnaðist at vinna grannauppgerðina og kommunuuppgerðina ímóti NSÍ. Úrslitið var 2-1, eftir at heimaliðið í fyrra hálvleiki var frammanfyri 2-0 – við vindinum ímóti.
Úrslitið ber við sær, at Skála hevur vunnið tveir dystir á rað – á útivølli ímóti HB og á heimavølli ímóti NSÍ. Úrtøkan er sekstan stig, og harvið er Skála fimm stig omanfyri strikuna.
Tapið á Skála var tað fyrsta hjá NSÍ síðani í øðrum umfari, tá ið Víkingur vann 1-0 í Runavík. Skála telist millum argastu mótstøðuliðini hjá NSÍ. Fyrri dysturin teirra millum – í Runavík – endaði 1-1.
Hjá Víkingi og KÍ var eingin slingur í valsinum.
Víkingur vann 4-2 í Sørvági, hóast heimaliðið eina løtu var frammanfyri 2-0. At 07 Vestur dygst undan steðginum varð undirmannað vísti seg at vera dyggur smeitur.
ÍF javnaði til 1-1 ímóti KÍ, men klaksvíkingar vístu seg at vera væl drúgvari. Albert Adu skoraði tvey av KÍ málunum í 4-1 sigrinum.
B36 vann fyri aðru ferð á rað, tá ið tað eydnaðist árstalsfelagnum at fara úr Streymnesi við 2-1 sigri.
Á jóansøku í Trongisvági endaði tað málleyst millum Suðringar og HB. Tað vóru nógvir áskoðarar og fáir málmøguleikar. Næst við at fáa mál var heimaliðið, tá ið Búi Egilsson tíggju minuttir undan leikloki smekkaði bóltin úr fýra metrum og upp undir tvørtræið.
ÍF-KÍ 1-4 (1-1)
0-1: sjálvmál
1-1: Dánjal á Lakjuni
1-2: Ahmed Mujdragic
1-3: Albert Adu
1-4: Albert Adu
Skála-NSÍ 2-1 (2-0)
1-0: Mamuka
2-0: Pætur Dam Jacobsen
2-1: Pól Jóhannus Justinussen
EB/Streymur-B36 1-2 (0-1)
0-1: Erlendur Magnusson
1-1: Brian Olsen
1-2: Gestur Bogason Dam
07 Vestur-Víkingur 2-4 (2-1)
1-0: Gunleif Magnusarson
2-0: Holgar Durhuus
2-1: Sølvi Vatnhamar
2-2: Gunnar Vatnhamar
2-3: Adeshina Lawal
2-4: Sølvi Vatnhamar
Suðringar-HB 0-0
Støðan eftir fjúrtanda umfar
Víkingur 29 stig
KÍ 29 stig
NSÍ 24 stig
B36 20 stig
Suðringar 20 stig
HB 18 stig
Skála 16 stig
EB/Streymur 14 stig
07 Vestur 11 stig
ÍF 6 stig
Fimtanda umfar
Fríggjadagin 21. juli
Víkingur-ÍF
Sunnudagur 23. juli
KÍ-Suðringar
EB/Streymur-HB
07 Vestur-NSÍ
B36-Skála
