Alment hátíðarhald verður í Norðskála-Oyrar skúla sunnudagin, har millum annað filmur og útvarpsbrot frá sjálvari vígsluni verða sýnd fram, umframt annað forkunnugt Í hesum døgum eru 40 ár liðin síðani Norðskála-Oyrar skúli varð vígdur. Í tí sambandi verður skipað fyri almennum hátíðarhaldi sunnudagin klokkan 16.00, har nógv forkunnugt og spennandi er á skránni.
Millum annað er eitt næmingayvirlit gjørt, ið vísir, at 329 næmingar hava gingið í Norðskála-Oyrar skúla. Hetta sama yvirlit vísir eisini, hvar gomlu næmingarnir búgva í dag og hvat teir starvast við.
Av øðrum forkunnugum er bæði sjónvarps- og útvarpsbrot, umframt gamlar myndir. Eisini hava fyrireikararnir fingið hendur á gomlum protokollum, ið føra smá 100 ár aftur ? protokollir frá gamla Oyrar skúla og Norðskála skúla.
Fyrireikararnir siga seg vóna at savna gamlar næmingar og avvarðandi, umframt onnur, ið hava áhuga fyri tiltakinum sunnudagin.
Skráin er henda:
- Filmur frá vígslu skúlans
- Brot úr útvarpssending, tá skúlin varð vígdur
- Framsýning við gomlum skúlamyndum
- Hugleiðing um skúlatíðina tá
- Næmingayvirlit yvir hesi 40 árini
- Kaffi og køkur
