Øðrvísi er statt á Norðlýsinum í Klaksvík. At knotur eru í sølufólkunum har norðuri, tað mugu vit bara sanna, samstundis sum marknaðardeildirnar hjá miðstaðarpressuni rodna av skomm, tí í Norðlýsinum kostar ein lýsingarsíða 12.500 krónur! Tað vísa skjøl, sum Klaksvíkar kommuna hevur sent okkum.
Síðsta fríggjadag kom Norðlýsið í hvørt hús í landinum. Blaðið var á tremur við góðum tilfari um, hvussu gott tað er í Klaksvík, og hvussu órein øll í Havn eru, sum bara taka frá klaksvíkingum.
Og nógv eru í øðini um hetta blað, serliga javnaðarfólk, sum føla seg illa happað. Fleiri eru beinleiðis fornermað.
Men vit í miðlunum, vit eru flóv. Vit eru flóv av, at vit ikki klára at kappast við Norðlýsið um lýsingarnar. Vit eru flóv av, at tildømis Klaksvíkar kommuna heldur vil betala 12.500 krónur fyri síðu 29 í Norðlýsinum enn dumpingprís í Dimmalætting, Sosialinum ella í Kringvarpinum.
Gunvá við Keldu, borgmeistari, fekk sín boðskap út. Hon hevur úr kommunukassanum í Klaksvík goldið Norðlýsinum 49.108 krónur og 75 oyru! Og tað er bara fyri lýsingar á teimum fimm síðunum, ikki fyri innihaldið, tí tað er ikki lov. So kemur brúkaraumboðsmaðurin eftir Norðlýsinum.
Segði nakar okursprísur? 12.500 krónur fyri síðu 29 í Norðlýsinum, tað er í øllum førum kuul.
Spurningurin er so bara, um tey á Norðlýsinum eru góð sølufólk, um borgarstjórin í Klaksvík er eitt hopleyst oyðsl, sum ikki dugir at umsita skattaborgarans pengar, ella um talan er um dulda reklamu, sum brúkaraumboðsmaðurin eigur at taka sær av...
(Vit kunnu skoyta uppí her, at Heðin Mortensen hevur havt ein følara úti hjá okkum, men sig einki!)
