Talsmaðurin hjá Kreml, Dmitrij Peskov, er nýliga spurdur, um útbreiðslan av amerikanskum kjarnorkuvápnum í Evropa órógvar Russland.
Í sínum svari viðgongur talsmaðurin, at hetta kennist órógvandi í Moskva. Tíðindafólk spurdu eisini, hvat svarið hjá Russlandi er.
- Eitt hóskandi svar, endurgevur statsriknað russiska tíðindastovan Tass hann fyri at siga.
Herfyri gjørdist greitt, at Russland ætlar at seta kjarnorkuvápn upp í Hvítarusslandi, og russiski forsetin sigur seg vóna, at arbeiðið verður liðugt í juli í ár.
- Vit lata ikki eftirlitið við okkara kjarnorkuvápnum til Hvítarusslands, men vit seta tey upp har. Júst, soleiðis sum USA hevur gjørt í Evropa í fleiri ár.
Tað segði russiski forsetin, Vladimir Putin, tá hann hevði kunngjørt hesar kjarnorkuætlanir, sum Russland og Hvítarussland tykjast vera samd um.
Tíðindastovan NTB veit at siga, at í løtuni eru tað tilsamans níggju lond, sum hava kjarnorkuvápn í sínum vápnagoymslum.
Londini eru sambært tíðindastovuni USA, Russland, Stórabretland, Frakland, Kina, India, Pakistan, Ísrael og Norðurkorea.
Men, tað eru USA og Russland, sum hava nógv tær størstu goymslurnar.
- USA hevur í dag 1.770 spreingiløðingar, sum eru klárar at brúka, og Russland hevur 1.674 - Frakland hevur 240, og Stórabretland hevur 120, veit NTB at siga.
Tíðindastovan sigur einki um, hvussu nógvar spreingiløðingar eitt nú Kina, India, Pakistan, Ísrael og Norðurkorea hava.
