Niðurflytingarstríð fyri allar pengarnar í Premier League

Tveir dystir hava verið í Premier League í kvøld. Manchester City vann greiðan 4-0 sigur á Watford, meðan Aston Villa heldur óvæntað vann 1-0 á Arsenal.

Úrslitini hava við sær, at Aston Villa fyri fyrstu ferð í 144 dagar er røttu megin strikuna, meðan Watford nú er undir niðurflytingarstrikuni. Tey eru ájøvn í stigum og bara eitt mál skilur liðini í málúrtøkuni. Undir teimum er AFC Bournemouth, ið hevur sama málmun sum Watford.

Tað merkir, at tað verður dramatikkur fyri allar pengarnar í niðurflytingarstríðnum, tá 38. og seinasta umfar verður sunnudagin. Aston Villa spælir á útivølli móti West Ham, Watford er á útivølli móti Arsenal og AFC Bournemouth er á útivølli móti Everton.

Fyri Aston Villa er lykilin at fáa eitt minst líka gott úrslit sum Watford, uttan at AFC Bournemouth yvirhálar. Tað vil siga, at um AFC Bournemouth vinnur við fleiri málum, so skal Aston Villa í minst lagi fáa stig. Fyri Watford snýr tað seg um at fáa eitt betri úrslit enn Aston Villa, og samstundis halda AFC Bournemouth aftanfyri seg.

Torførastu treytirnar hevur AFC Bournemouth, ið skal vinna sín dyst móti Everton og samstundis vóna at bæði Aston Villa og Watford tapa sínar dystir. Norwich er longu flutt niður, meðan Leeds United verður ein av uppflytarunum.