Fjósið er 2000 fermetrar til støddar og hevur pláss fyri 180 neytum, og er útgjørt so mikið væl og djóravinarligt, at tað má teljast millum tey allar fremstu fjósini í Norðurlondum.
Innanveggja er alt gjørt fyri at umstøðurnar hjá neytunum verða so líkar náttúruni sum gjørligt. Ein partur av hesum er at lata neytini ganga á gummimáttum og at hava liggibásar við bleytum undirlagi, eins og bøurin uttanfyri.
Neytini standa enn í ymiskum fjósum, men í kvøld verða tey flutt til tær nýggju og sera modernaðu umstøðurnar í Havnardali. Og í morgin byrjar so framleiðslan av mjólk.
Í einum komandi blaði verður greitt nærri frá fjósinum og teim møguleikum tað fer at geva fyri føroyskan landbúnað.
