Neistin syrgdi sunnudagin fyri, at spenningurin í 1. deild hjá kvinnum varð varðveittur, við at vinna á oddaliðnum StÍF í einum sera jøvnum dysti, sum kundi farið báðar vegir. Seinni sama dag vann Kyndil á GÍ á Kambsdali, so trý lið nú aftur kappast um FM-heitið, sum tað annars sá út til, at StÍF hevði tryggjað sær.
Dysturin var sum sagt sera javnur, og liðini fylgdust allan vegin uppeftir. Í hálvleikinum stóð á jøvnum 11-11, men í seinna hálvleiki fekk Neistin eitt mál meira enn StÍF og vann 20-19.
Neistin byrjaði dystin betur og fekk trý tey fyrstu málini. So tók StÍF time-out, og fimm minuttir seinni stóð á jøvnum 4-4. Og har frá gjørdist munurin ikki størri enn eitt mál fyrr enn í allarseinasta minuttinum, tá Neistin førdi 20-18. Tá fekk StÍF brotskast, og hevði Signhild Petersen, sum vanliga er eitt av álitunum á liðnum, skorað tá, hevði StÍF kanska fingið eitt stig burturúr. Men okkurt løgið hevur gingið fyri seg í høvdinum hjá Signhild, tí hon skeyt bóltin langt við síðuna av málinum, og so var ov seint hjá strandakvinnum at koma afturíaftur.
Áttu at lagt
meira trýst á
»Nýggja« dómaraparið Birgir Sondum og Andreas F. Hansen løgdu eina harða linju frá byrjan av, og tá fyrri hálvleikur var komin í helvt, hevði Rúna Wardum hjá Neistanum fingið eitt gult kort og tvær útvísingar. Um StÍF restina av dystinum hevði lagt meira trýst á høgru síðu av Neistaverjuni við Rúnu og Káru á Dunga, hevði tað kanska gingið øðrvísi, men Paula B. Jacobsen á vinstra bakki hjá StÍF var ikki so væl fyri sum vanligt, og Rúna kundi róliga halda seg í skinninum restina av dystinum. Í staðin var tað liðskiparin Eyðleyg Mikkelsen hjá StÍF, sum var besti leikari hjá heimaliðnum.
Í hinum endanum var Inga Danberg óvanliga óheppin. Óteljandi ferðir endaðu skotini á stengrunum, men tað var kortini Neistin, sum var hepnari og vann henda javna dystin. Fyri StÍF er at vóna, at tær ikki missa mótið nú, og at ósigurin, sum tað sama kundi verið ein sigur, fer at gera, at tær spæla sær av við FM-heitið.
Neistaliðið reisti seg aftur eftir ósigurin móti Kyndli næstseinasta vikuskifti og skal nú aftur takast í fullum álvara. Á pappírinum hevur Neistin eisini »lættastu« dystirnir eftir. Tríggjar heimadystir móti botnliðunum GÍ, Stjørnuni og at enda VB, umframt ein »útidyst« móti Kyndli. Bæði StÍF og Kyndil skulu hinvegin út at ferðast seinni í kappingini. Bæði liðini hava torføra dystin í Vági eftir, og StÍF skal eisini til Klaksvíkar. Og so er tað sjálvandi dysturin í seinasta umfari millum StÍF og Kyndil á Skála. Um spurningurin um FM-heitið verður avgjørdur her, ella um talan bert verður um ein dyst um silvur og bronsu, er ógjørligt at siga. Kappingin hjá kvinnunum er javnari enn nakrantíð við trimum liðum, sum eru so at siga eins góð, og sum øll vinna og tapa móti hvørjumøðrum.
1. deild kvinnur:
StÍF-Neistin 19-20 (11-11)
StÍF: Eyðleyg Mikkelsen 5, Paula B. Jacobsen 4, Alis Høghamar 3, Signhild Petersen 3, Katrin Petersen 2, Anna Maria Berthelsen 1, Bjørg Mikkelsen 1.
Neistin: Inga Danberg 5, Rúna Wardum 4, Mildrið Jacobsen 3, Súna Mørk 3, Kára á Dunga 2, Lovisa Jørgensen 2, Bjørg Patursson 1.
Útvísingar: StÍF 2, Neistin 5.
