Neistin, sum hevur spælt ein dyst meira enn Tjaldur og Stjørnan, hevði í kvøld gyltan møguleika at halda fast um oddasessin í Sunsetkappingini og munin niður til hini bæði. Men í grannauppgerðini ímóti Kyndli snávaði Neistin, tí tær grønu stríddust so væl, at úrslitið gjørdist javnleikur 16-16.
Á heimavølli í Klaksvík eydnaðist Stjørnuni at reisa seg eftir eyðmýkingina í Vági sunnudagin, tá VB vann við heilum átta málum. Hesa ferð hevði Stjørnan vitjan av VÍF og vann ein tryggan 29-20 sigur, ið ger, at Stjørnan nú er tvey stig aftan fyri Neistan og eitt aftan fyri Tjaldur.
Tjaldur hevði stutta leið til útidystin hesa ferð, tí hann var á Skála ímóti StÍF. Úrslitið gjørdist, at Tjaldur vann 30-23, og hetta var samstundis tíggjundi sigurin hjá teimum gulu úr Runavík, síðani Trygvi Mortensen tók við sum venjari fyri tveimum mánaðum síðani.
Úrslit í kvøld:
Neistin-Kyndil 16-16
Stjørnan-VÍF 29-20
StÍF-Tjaldur 23-30
Støðan:
Neistin 24
Tjaldur 23
Stjørnan 22
Kyndil 13
VB 13
VÍF 6
StÍF 1
