Neistin kann bara takka sær sjálvum fyri, at liðið ikki er á odda við trimum stigum í Sunset-deildini júst nú.
Neistin var á odda 28-25, tá átta minuttir restaðu í av oddadystinum í Runavík. So kom stígur í. Tjaldur vann dystin 29-28.
- Vit ræðast onkursvegna støðuna, vit eru í, og tað eru ov fáar, ið hava neyðuga dirvið at taka ábyrgd. Vit mangla rutinu í dag, sigur Birgir Hansen, venjari hjá Neistanum.
Venjarin hjá bláu høvusstaðarkvinnunum tók time-out, men tað hjálpti lítið. Neistin spældi seg hinvegin til upplagdar málmøguleikar, men tók ikki av. Barbara Brauer, sum skeyt seks mál, slapp ongantíð í skotstøðu. Í seinasta álopinum í dystinum sendu kvinnurnar úr Havn í stólpan.
Tískil kundu Trygvi Mortensen og Tjaldur stórfegnast um sigurin. Kvinnurnar úr Runavík buldra víðari, og tær hava nú vunnið níggju landskappingardystir upp í slag.
Bjartskygdur
Hóast Neistin misti eitt fet í gjár, eru Birgir Hansen og hansara leikarar framvegis væl við í stríðnum um finalupláss.
Neistin manglar rutinu, men liðið lærir nógv av slíkum tøttum dystum.
- Tað ræður um at enda fremst ella næstfremst, og í so máta hava vit ikki mist stórvegis. Tað er ótrúliga keðiligt at missa alt á gólvið. Vit hava kós móti sigrinum, men tapa alt í seinastu løtu. Hinvegin ivist eg ikki í, at vit hava lært nógv av hesum dystinum, sigur Birgir Hansen.
Simona Petersen og Adina Petra vóru stórspælandi í álopinum hjá Tjaldur í gjár. Tær skutu 10 mál hvør.
