Nýtt felag
Smyril Blue Water bjóðar sínum viðskiftafólkum ein serstakan flutningshátt fyri rullandi farm millum Norðurlond, Evropa og londini í Norðuratlantshavi. Talan er um beinleiðis flutning á hjólum allan vegin frá sendara til móttakara. Á tann hátt kann felagið t.d. flyta fisk og aðrar kølivørur í óbrotnari køliketu uttan at umskipa farmin.
Smyril Line, og danska farmaflutningsfelagið, Blue Water, hava í felag stovnað nýggja felagið.
Smyril Line hevur í meira enn 20 ár rikið ferðafólka- og farmaflutning á Norðuratlantshavinum, og eitt týdningarmikið stig varð tikið, tá felagið yvirtók nýggju Norrönu í 2003. Norröna er umframt at vera bygd til ferðafólkaflutning eisini bygd til farm, og hon kann taka upp í 130 trailarar.
Blue Water hevur ræði á einum vælskipaðum flutningskervi. Felagið hevur eitt stórt netverk av flutningsstøðum í Danmark og meira enn 300 lastbilar á evropeisku lands- og motorvegunum.
Tættari samstarv
Smyril Line og Blue Water hava í fleiri ár samstarvað á farmaøkinum, og við nýggja farmaflutningsfelagnum fara partarnir í tættari samstarv um rullandi farmin, tí nýggja felagið er tað einasta á marknaðinum, sum bjóðar ro/ro flutning á Norðuratlantshavinum.
Nýggja felagið skal avgreiða, samskipa og marknaðarføra farmaflutningin. Felagið keypir síðani pláss um borð á Norrönu og á flutningskervinum hjá Blue Water.
Smyril Blue Water fær egnar skrivstovur í Føroyum, Íslandi og Danmark.
Suðurgangandi úr Íslandi og Føroyum verður í høvuðsheitum fluttur fiskur, og norðurgangandi úr Danmark og av meginlandinum til Føroyar og Íslands verður alt slag av góðsi flutt ? frá gerandisvørum til byggitilfar v.m.
Harumframt bjóðar nýggja felagið eisini farmaflutning loftvegis og bingjuflutning úr Føroyum og Íslandi út í heim umvegis heimsumfatandi netverkið hjá Blue Water av søluumboðum og 36 egnum skrivstovum í 19 londum.
Nýggja felagið vil hava so nógv, sum til ber, burtur úr samstarvinum millum Smyril Line og Blue Water. Málið hjá Smyril Blue Water er at veita ta bestu farmaflutningstænastuna á Norðuratlantshavinum grundað á ein serstakan hurð til hurð flutningshátt við stuttum flutningstíðum.
