Eitt nýtt loftálop hevur rakt eitt iranskt mál norðan fyri høvuðsstaðin í Irak, Bagdad, skrivar tíðindastovan AFP í nátt.
Tað stendur ikki greitt í boðunum, hvør hevur framt álopið.
Irakiskt ríkissjónvarp hevur tó sagt, at USA stendur aftanfyri, og at tað var vent ímóti einum høgum limi í militsini Hashed al-Shaabi.
USA hevur ikki gjørt viðmerkingar til tíðindini, og tað verður ikki greitt nærri frá, hvør persónurin er, sum skuldi verið álopin.
Hashed al-Shaabi hevur sambært tíðindastovuni Reuters sent eini boð út um, at álopið rakti eina konvoy við heilsustarvsfólki – ikki høgum limum.
Reuters skrivar, at loftálopið ímóti militskonvoyini norðan fyri Bagdad hevur kostað seks fólkum lívið.
Trý fólk eru harafturat særd í álopinum. Tveir av trimum bilum í konvoyini eru kolaðir upp.
Álopið hendir dagin eftir eitt amerikanskt dronuálop í Bagdad á ein høgan iranskan heryvirmann, sum hevur gjørt viðurskiftini milum USA og Iran spentari.
Fleiri rakettir drupu eftir boðum frá Donald Trump, høgtstandandi yvirmannin Quassem Soleimani, leiðara í Quds-deidlini í Iranska Kollveltingarherinum.
Hann varð roknaður sum tann valdsmesti og tann, sum hevði tættast viðurskifti við evsta leiðaran í Iran, ayatollah Ali Khamenei.
Eisini næstovastin fyri Hashed al-Shaabi, Abu Mahdi al-Muhandis, varð dripin í dronuálopinum.
Hashed al-Shaabi er kent sum eitt valdsmikið netverk av serliga shiamuslimskum militsum.
Nógvir partar av Hashed al-Shaabi hava tøtt bond við Iran, men eru eisini alment tikin við í ríkisligu trygdardeildirnar, skrivar AFP.
Tað vóru millum annað stuðlar hjá Hashed al-Shaabi, sum týsdagin kringsettu og lupu á amerikonsku sendistovuna í Bagdad.
Tað hendi sum svar upp á eitt amerikanskt loftálop, sum drap 25 fólk úr Kataeb Hizbollah-militsini, sum hoyrir undir Hashed al-Shaabi og er kend sum ein av mest víðgongdu deildum í militsini.
Dagsins álop rakti, bert tímar undan eina minnisgongu fyri Soleimani.
/ritzau/
