Sosialurin veit, at Fólkaflokkurin hevur ikki tosað við sínar samgongufelagar um hesa ætlan, áðrenn avgerðin varð tikin. Tí er uttan iva talan um spinn frá Fólkafloksins síðu.
Fjølmiðlarnir vórðu kunnaðir áðrenn samgonguflokkarnir, og meðan blaðmaður okkara tosaði við Jóannes Eidesgaard, kom tíðindaskriv frá løgmanni um, at hann hevði loyst Jørgen Niclasen úr starvi og sett Jacob Vestergaard sum landsstýrismann í uttanríkisráðnum eisini.
Uttan iva skal Fólkaflokkurin brúka hetta til at vísa, at flokkurin ynskir sparingar í landsumsitingini. Men við hesum er sparingin ógvuliga minimal - og fyri árið í ár er talan um eina eykaútreiðslu fyri landskassan.
Anfinn Kallsberg leggur frá sær í politikki. Hann hevur verið valdur tingmaður í góð 30 ár, hann varð fyrstu ferð valdur á ting 8. november í 1980 og er valdur hvørja ferð síðani, Hann hevur verið landsstýrismaður og løgmaður í tilsamans 10 ár. Tað merkir, at hann hevur rætt til fulla løgmanspensjón frá tí at hann er 60 ár. Hann er 63 ár. Tað merkir, at hann fær umleið 30.000 krónur í pensjón so leingi hann livir.
Ein landsstýrismaður fær í løn og ágóðum slakar 50.000 krónur. Tað merkir, at sparingin við at koyra ein landsstýrismann út og koyra Anfinn Kalssberg upp á pensjón er einar 20.000 krónur.
Men bæði Anfinn Kallsberg og Jørgen Niclasen skulu hava ávikavist løgtings- og landsstýrismannaløn í seks mánaðir, so tað merkir, at landskassin fær eina eykaútreiðslu av hesum í ár.
Tá ein samgonguflokkur ger slíkt í óðum verki – uttan at kunna samgongufelagarnar áðrenn, so merkir tað, at stevið í samgonguni er ringt, at flokkurin skal profilera seg – og at nýval er í væntu.
