Tað er ymiskt, hvussu veðrið háttar sær um landið í løtuni.
Í Havnini er támut, regn, men stilt, men so er ikki allastaðni.
Landsverk boðar frá nógvum vindi í Streymnesi. Hóast tað er eitt andøvsgul, um 8 m/s, so eru hvirlurnar sera harðar, upp í hvassan storm, 26 m/s.
Mesti vindurin letur til at vera sunnanfyri, tí bæði í Hvalba, um Ørðaskarð og á Porkerishálsi sigur Landsverk, at bilførarar mugu koyra varliga.
Í Hvalba er hvassur vindur, um 15 m/s, í hvirlunum upp í hvassan storm, 27 m/s. Um Ørðaskarð er skrið, 18 m/s, men í hvirlunum eisini hvassur stormur, 27 m/s.
Á Porkerishálsi er eisini skrið, 18 m/s, men í hvirlunum kolandi stormur, upp í 28 m/s.
Danska veðurstovan boðar frá nakað av vindi í dag, upp í hvassan vind, 15 m/s, og í morgin upp í skrið, 18 m/s, men heilt upp í 25 m/s í hvirlunum.
