Løgmaður, Kaj Leo Holm Johannesen hevur gjørt av at staðfesta avgerðina hjá Skráseting Føroya um at taka løggildingina frá grannskoðarum í grannskoðaramálinum, sum tað vanliga verður nevnt.
- Tað merkir, at løggildingarnar hjá grannskoðarunum verða tiknar aftur. Tó verður eitt árs frestin hjá fýra av grannskoðaranum at taka lógarásettu próvtøkuna longd, til trý ár, sigur løgmaður.
Grundgevingin fyri longdu frestini er, at løgmaður heldur, at próvtøkan kann væntast at verða á so høgum stigi, at rúmari fyrireikingartíð krevst enn hon, Skráseting Føroya hevur ásett.
Løgmaður hevur somuleiðis heitt á landsstýrismannin í vinnumálum um at tryggja, at Skráseting Føroya kannar, um løggildingin hjá grannskoðaranum við norskari løggilding skal takast aftur.
Hetta tí, at Løgtingsins umboðsmaður í síni frágreiðing dagfest 2. november 2010 sigur, at avgerðin hjá Skráseting Føroya um at tilnevna nevnda umsøkjara er tikin á einum skeivum grundarlagi.
