Sum vant eru fólk í túsundatali komin til Betlehem á Vestara Áarbakka í dag at hátíðarhalda Jesu føðing, og sambært tíðindastovunum eru øll gistingarhúsini full av gestum. Roknað verður við, at umleið 50.000 fólk úr øllum heiminum eru í Betlehem í dag.
-Gistingarhúsini eru full. Vit hava einki pláss eftir, sjálvt um vit hava tríggjar ferðir so nógv pláss nú sum fyri trimum árum síðani, sigur palestinski ferðavinnumálaráðharrin, Khulad Taibes.
Í miðbýnum í Betlehem er eitt ovurstórt væl pyntað jólatræ. Tað stendur ikki langt frá Føðikirkjuni, har Jesus sambært frásøgnini varð borðin í heim.
Nógvir muslimar eru eisini í Betlehem í kvøld. Teirra millum eru kvinnur við børnum, sum hátíðarhalda Jesu føðing. Á arabiskum máli eitur Jesus "Isa", og muslimarnir rokna hann sum profet.
