Borðtennissamband Føroya skipaði 1. páskadag fyri dómaraskeiði. Skeiðshaldari var altjóða dómarin og instruktørurin, Preben Søndergaard úr Danmark.
Níggju luttakarar vóru á skeiðnum og skuldu teir eftir fýra tímum av undirvísing til roynd, har teir skuldu svara 50 spurningum. Tað gekst teimum sera væl. Umframt at allir kláraðu royndina fingu teir tað felags skoðsmál frá undirvísaranum, at úrslitið var hitt besta, hann nakrantíð hevði sæð – og nevnast skal, at Preben Søndergaard hevur útbúgvið hundraðtals dómarar.
2. páskadag skuldu nýggju dómararnir til eina praktiska roynd og dømdu teir allir í minsta lagi tveir dystir hvør í innleiðandi umførunum í FM-kappingini, sum vórðu spæld í skúlanum við Løgmannabreyt í Hoyvík.
