Nógv verður gjørt fyri at veita eina so góða tænastu sum tilber fyri foreldur, ið annaðhvørt hava børn í skúlaaldur ella undir í Hvannasunds kommunu.
Fyri tíð síðani kundu tey í skúlanum á Fossánesi taka í brúk ein útbygdan part av bygninginum, og um fáar mánaðir verður nýggi dagstovnurin tikin í nýtslu í nánd av skúlanum.
Hesin hevur verið í gerð í eina tíð. Nú er komið so langt at umsóknirnar til starvsfólkini eru innkomnar og byrja tey hálvan mars.
- Ætlanin er so at taka dagstovnin í nýtslu mánadagin 2. apríl, upplýsir leiðarin fyri dagrøktina í Hvannasunds kommunu, Sigga Óladóttir Joensen.
Nú dagstovnurin kann takast í nýtslu er hann ikki fullsettur av børnunum beinanvegin. Tað vóna tey, at hann so líðandi fer at vera.
Hugsandi er, at onkur kann fara at flyta til bygdina av hesi orsøk, nú so nógv er gjørt bæði við skúla og dagstovn.
