Í september 2007 kom fyrsta útgávan ”Love is Dead” út. Hon var stak væl móttikin og vóru ummælini øll sera góð. Tvey ár eftir, kom ”The Sky is Opening” á marknaðin og var hon millum best umtóktu og best seljandi fløgur í Føroyum, 2009 og m.a annað var fløgan kosin ársini fløga á Planet Awards 2009.
Tey síðstu árini hevur Guðrið verið sera virkin á tónleikapallinum her heima og uttanlands.
”Beyond the Grey” er eitt sindur øðrvísi, enn undanfarnu útgávurnar. Stílurin er nú meira fólkatónleikur við akkustiskum ljóðførum og sungið er bæði á enskum og føroyskum. Guðrið hevur gjørt allan tónleikin á fløguni og amerikanski rithøvundurin Randi Ward, eigur øll orðini. Randi Ward skrivaði yrkingarnar, ímeðan hon var búðsitandi í Føroyum eitt tíðarskifti, í meðan hon læs á Fróðskaparsetrinum. Løgini snúgva seg um føroysk viðurskifti, eitt nú um føroyskar fiskimenn, føroyska dansin, um mjørkan, veðurlagið, lívið úti á bygd og um kærleika.
Upptøkur vóru gjørdar í Lundgaard studio í Danmark í oktober mánaða í fjør og síðan vóru aðrar upptøkur gjørdar í Sólarmagn á Velbastað. Fløgan er framleidd av Mikael Blak, sum eisini framleiddi The Sky is Opening. George Tanderø hevur ljóðblandað fløguna í Livingroom Studios í Oslo. Húsa og grafikk hevur amerikanska listakvinnan Maria Pugnetti gjørt.
Ì samband við at fløgan kemur út verður móttøka í Tutlhandlinum fríggjakvøldið 3. juni.
